Габрыэлюс Ландсбергіс: Бачу падставу для стабільнага ўрада Літвы

Старшыня партыі кансерватараў «Саюз бацькаўшчыны - Хрысціянскія дэмакраты Літвы» Габрыэлюс Ландсбергіс кажа, што фармаванне будучай кааліцыі можа пачацца ўжо сёння.

«Калі мы будзем казаць пра асоб, то я ўжо гэта распавядаў не раз, я бачу, што дамова трох прадстаўнікоў - маёй партыі, партый Саўлюса Сквярняліса і Эўгеніюса Гентвіаса - можа скласці падставу для рэальна стабільнага ўрада. Я ў гэта веру. Многія нашы дыскусіі, дэбаты, гутаркі, якія мелі месца да выбараў, насамрэч дазваляюць дастаткова спакойна гэта меркаваць. Але мы паглядзім, бо не ўсе такія рацыянальныя, не ўсе трымаюць дадзенае слова», - сказаў лідар кансерватараў BNS пасля старту галасавання ў другім туры парламенцкіх выбараў у нядзелю, паведамляе ru.delfi.lt.

Старшыня СА-ХДЛ у другім туры не галасаваў, бо ў ягонай выбарчай акрузе кансерватар Інгрыда Шымон была выбраная ў сейм ужо ў першым туры.

Паводле ягоных слоў, Саюз сялян і зялёных Літвы (СКЗЛ) на перамовах аб кааліцыі павінен рэпрэзентаваць менавіта лідар выбарчага спісу С. Сквярняліс, а не старшыня партыі Рамунас Карбаўскіс.

«Калі гэты чалавек вывеў спіс наперад, я практычна перакананы, што дзякуючы яму гэтая партыя так добра выступіла на выбарах, так што я мяркую, што калі людзі перадалі яму адказнасць весці спіс, то ён не стане бегчы ад адказнасці», - разважаў Г. Ландсбергіс.

Паводле ягоных слоў, важная роля пры фармаванні кааліцыі адводзіцца і прэзідэнту, аднак перш за ўсё трэба ўлічваць волю выбаршчыкаў. Ён таксама сказаў, што ў тым выпадку, калі пераможца выбараў зразумелы, то фармаванне кааліцыі павінна пачацца неадкладна - магчыма, ужо сёння ўвечары.

У выпадку, калі вынікі партый, што перамагаюць, будуць роўнымі, то, на думку Ландсбергіса, выбраць будучага прэм'ера можна было б на падставе першачарговасці галасоў. Ён выказаў надзею, што ў партыі, якую ён узначальвае, пасля гэтых выбараў будзе ў сойме 40-45 мандатаў.

9 кастрычніка на першым туры выбараў абрана 70 парламентарыяў у шматмандатнай акрузе і тры - у аднамандатных акругах. Паводле звестак Галоўвыбаркама, у шматмандатнай акрузе ў першым туры СА - ХДЛ атрымалі 20 мандатаў, СКЗЛ - 19, Літоўская сацыял-дэмакратычная партыя - 13, Літоўскі ліберальнае рух - 8, Выбарчая акцыя палякаў Літвы - Саюз хрысціянскіх сем'яў і партыя «Парадак і справядлівасць» - па 5 мандатаў.

Таксама ў першым туры ў аднамандатных акругах былі абраныя два прадстаўнікі палякаў Літвы і кансерватар. У другі тур выбараў у сойм прайшлі 42 кандыдаты партыі СА - ХДЛ, 40 кандыдатаў партыі СКЗЛ, 21 кандыдат Літоўскай сацыял-дэмакратычнай партыі, 12 кандыдатаў Літоўскага ліберальнага руху, пяць кандыдатаў Партыі працы, пяць кандыдатаў-самавылучэнцаў, чатыры кандыдаты партыі «Парадак і справядлівасць», па два кандыдаты Выбарчай акцыі палякаў Літвы - саюза хрысціянскіх сем'яў і Літоўскага саюза волі (лібералаў), па аднаму кандыдату «Спісу Літвы», Літоўскай партыі зялёных і Антыкарупцыйнай кааліцыі Н. Пуцейкіса і К. Крывіцкаса.

Сейм новага склікання павінен правесці першае пасяджэнне цягам 15 дзён пасля абрання парламента, папярэдняя дата першага пасяджэння - 10 лістапада. Першае пасяджэнне сейма склікае прэзідэнт.