Барыс Жаліба: Беларусы праядаюць валюту
5- 24.10.2016, 15:17
- 14,284
Шмат у чым курс беларускага рубля падтрымліваецца на стабільным узроўні, бо насельніцтва прадае свае валютныя зберажэнні.
Нацыянальны банк Беларусі прагназуе зніжэнне ў 2017 годзе кошту рубля да кошыка валют на 5-7 адсоткаў. Ці рэальна здзейсніць гэтыя планы?
- Курс рубля вызначаюць многія фактары. У тым ліку і вонкавыя. У Беларусі чацвёрты год запар зніжаецца валютны даход і, як мяркуюць аналітыкі, шмат у чым курс беларускага рубля падтрымліваецца на стабільным узроўні, бо насельніцтва праядае свае валютныя запасы, у банкаўскай сістэме зніжаюцца валютныя дэпазіты. Гэтая валюта паступае на рынак і ўраўнаважвае сітуацыю, але запасы ў людзей не бясконцыя, ды і кошт нафты не вельмі павышаецца, каб пачаў моцна расці валютны прыбытак. Гэтак жа не падвышаюцца і кошты калію. Таму Нацбанк дае вельмі аптымістычныя прагнозы. Добра будзе, калі рубель застанецца на сённяшнім узроўні ў наступным годзе, - распавёў эканаміст Барыс Жаліба ў інтэрв'ю «Радыё Рацыi».
- Але сёння рубель у дачыненні да даляра і еўра насамрэч умацоўваецца...
- Як я ўжо казаў, насельніцтва гэтаму спрыяе, бо з пачатку года чысты продаж валюты фізічнымі асобамі склаў блізу паўтара мільярда даляраў. Гэта даволі вялікая сума. Што тычыцца коштаў нафты, то невядома, як у гэтай сферы будуць разгортвацца падзеі. Цяпер краіны, якія ўваходзяць у АПЕК, спрабуюць паменшыць здабычу нафты, і, магчыма, кошт нафты крыху пойдзе ўверх. Гэта таксама будзе спрыяць умацаванню беларускага рубля.