Крэмль рыхтаваў план «Шатун» для Украіны

Украінскія хакеры ўзламалі пошту памочніка прэзідэнта РФ Уладзіслава Суркова.

Украінская хакерская група «Кіберхунта» заявіла, што атрымала доступ да электроннай перапіскі памочніка расейскага прэзідэнта Уладзіслава Суркова, якога называюць неафіцыйным куратарам палітыкі Крамля ва Украіне.

На сваім сайце хакеры паведамілі, што аналізуюць перапіску Суркова з яго памочнікам Паўлам Карпавым, «які для канспірацыі падпісвае дакументы псеўданімам Паўлаў Мікалай Мікалаевіч». Прозвішча Карпава раней фігуравала ў справе былой лётчыцы, народнай дэпутаткі Украіны Надзеі Саўчанкі. Яна сцвярджала, што Карпаў удзельнічаў у яе выкраданні і вывазе ў Расею.

«У пошце Суркова намі знойдзеныя злачынныя планы Пуціна і яго паслугачоў аб захопе ўкраінскіх тэрыторый на Заходняй Украіне, у тым ліку планы ў дэстабілізацыі палітычнага жыцця ва Украіне і правядзенні датэрміновых парламенцкіх выбараў», - заявілі ў «Кіберхунце».

Хакеры апублікавалі два дакументы - «План першачарговых мерапрыемстваў для дэстабілізацыі грамадска-палітычнай сітуацыі на Украіне «Шатун» і «План канкрэтных мерапрыемстваў для прасоўвання федэральнага статусу Закарпацкай вобласці Украіны». Іх, як вынікае з апублікаванага «Кіберхунтой» скрыншота, Карпаў пераслаў Суркову ў жніўні гэтага года.

У першым дакуменце сказана, што ў сувязі з блакаваннем ініцыятыў РФ на перамовах у нармандскім і менскім фарматах рэалізацыя плана рэінтэграцыі ва Украіну тэрыторый, якія кантралююцца «ДНР» і «ЛНР», патрабуе прыняцця неадкладных дадатковых комплексных мер «дэстабілізацыі сітуацыі ва Украіне. Ідэальны перыяд для гэтага, на думку аўтараў запіскі, - лістапад 2016 - сакавік 2017 года.

Сярод прапанаваных мер - перамовы з апазіцыйнымі партыямі (Апазіцыйны блок, «Бацькаўшчына» і Радыкальная партыя) па арганізацыі «агульнадзяржаўнага пратэсту - «тарыфнага Майдана», які павінен пачацца ў другой палове лістапада ва ўсіх рэгіёнах Украіны.

Для «разварушвання грамадскай думкі» прапануецца распаўсюджваць фэйкавыя відэа- і аўдыёматэрыялы, скрыншоты перапісак з выкрыццямі карупцыйных сувязяў прэзідэнта Украіны Пятра Парашэнкі і яго атачэння. У гэтым аўтары дакумента прапануюць «наўгад задзейнічаць» народных дэпутатаў ад Блока Пятра Парашэнкі Мустафу Найема, Сяргея Лешчанку, Святлану Залішчук і Вольгу Чэрвакову, грамадскага актывіста Віталя Шабуніна, журналістаў Зміцера Гнапа, Дзяніса Бігуса, Аляксандра Дубінскага і Аляксея Шалайскага, вядомых сваімі антыкарупцыйнымі расследаваннямі.

«Інфармацыя, якую перадавалі названым асобам, павінна быць дакладнай, поўнай і зыходзіць ад нашых крыніц у Еўропе і ЗША», - сказана ў матэрыялах.

Сярод іншых запланаваных крокаў дэстабілізацыі сітуацыі ва Украіне - крытыка дзеянняў урада, укараненне ў сераду валанцёраў «патрэбных асоб», якія будуць сеяць паніку сярод вайскоўцаў, што іх «зліваюць», актывізацыя дзейнасці прарасейскіх арганізацый і інш.

Другі дакумент тычыцца мерапрыемстваў атрымання Закарпацкай вобласцю «аўтаномнага, федэральнага статусу ў складзе адзінай Украіны», для чаго прапануецца актывізаваць дзейнасць прарасейскіх арганізацый. У плане пазначаныя тэрміны гэтых мерапрыемстваў - верасень-снежань, але не пазначаны год.

У скрыншоце лісты, які распаўсюдзілі хакеры, Карпаў прасіў Суркова «перагледзець тэрміны па Закарпацці».

Народны дэпутат ад «Народнага фронту», сябра калегіі МУС Украіны Антон Герашчанка напісаў у Facebook, што з ягонай інфармацыі, «узлом пошты Уладзіслава Суркова - праўда, а дакументы, выкладзеныя «Кіберхунтой», дакладныя».