Беларускі трэнер Алег Конанаў прыбыў на стажыроўку ў «Чэлсі»
1- 26.10.2016, 12:39
- 16,659
Са слоў Конанава, яго заўсёды цікавіў высокі ўзровень фізпадрыхтоўкі гульцоў ангельскай прэм'ер-лігі.
Былы галоўны трэнер клуба расейскай футбольнай прэм'ер-лігі «Краснадар», беларускі спецыяліст Алег Конанаў праходзіць стажыроўку ў лонданскім «Чэлсі».
Пра гэта Конанаў распавёў «Советскому спорту».
«Мяне заўсёды цікавіў футбол у Англіі, тое, як працуюць галоўныя трэнеры, іх узаемадзеянне з трэнерскім штабам, праграмнае забеспячэнне», - патлумачыў Конанаў.
Таксама ён адзначыў, што назірае за працэсам фізічнай падрыхтоўкі гульцоў ангельскай прэм'ер-лігі (АПЛ).
«Усе гульцы ў ангельскіх клубах адрозніваюцца хвацкай фізпадрыхтоўкай. Цягам 90 хвілін працуюць з высокай інтэнсіўнасцю, амаль не губляюць хуткасць. Вядома, гэта таксама цікава. Разумею, што многае ідзе яшчэ з юнацкага і маладзёжнага футбола» - адзначыў спецыяліст.
Таксама крыніца паведамляе, што Конанаў наведаў матч чэмпіянату Англіі паміж «Чэлсі» і «Манчэстар Юнайтэд», які завяршыўся перамогай сініх з лікам 4:0.
Лонданскім клубам валодае расейскі бізнэсовец Раман Абрамовіч. Ён набыў «Чэлсі» у 2003 годзе за за 140 мільёнаў фунтаў стэрлінгаў.