Велаклуб «Мінск» перамог трэці запар этап на гонцы першай катэгорыі ў ААЭ

Заключны этап міжнароднай шматдзённай велагонкі Sharjah Tour скончыўся яшчэ адной прыгожай вікторыяй гоншчыка «Мінска».

Чацвёрты этап міжнароднай шматдзённай велагонкі Sharjah Tour скончыўся яшчэ адной перамогай гоншчыка «Мінска» Сяргея Папка. Ягоны аднаклубнік Станіслаў Бажкоў фінішаваў у топ-3 агульнага заліку і здабыў зялёную майку пераможцы балавай класіфікацыі, паведамляе tut.by.

Агулам этап даўжынёй 134 км праходзіў досыць спакойна. Ужо ў самым пачатку ў адрыў адпусцілі групу з чатырох чалавек. Менчукоў, роўна як і прадстаўнікоў іншых каманд, якія прэтэндуюць на высокія месцы ў генеральнай класіфікацыі, у гэтай кампаніі не выявілася.

Пелатон трымаў сітуацыю пад кантролем, не дазваляючы ўцекачам ад'ехаць больш чым на дзве хвіліны. Удзельнікам адрыву давялося задаволіцца баламі і секундамі, якія яны атрымалі на ўсіх трох прамежкавых спрынтах.

Кіламетраў за дзесяць да фінішу, калі група дабрала адрыў, «Мінск» сутыкнуўся з цэлай серыяй праколаў. Двойчы цягам некалькіх хвілін давялося змяняць колы Яўгену Собалю, затым пракалоўся Антон Івашкін. Пра тое, каб дагнаць разагнанага перад фінішам Пелатона, ужо не было і гаворкі. Абодва беларусы даязджалі гонку ў шматлікай кампаніі гоншчыкаў іншых каманд, якім таксама не пашанцавала на гэтым небяспечным адрэзку трасы.

Астатніх менчукоў зусім не збянтэжыла, што яны засталіся ўчатырох. Гоншчыкі «Мінска» ўпэўнена трымаліся наперадзе групы. Аляксандр Галаваш і Канстанцін Клімянкоў максімальна адпрацавалі на апошніх кіламетрах перад фінішам, а Станіслаў Бажкоў па-майстэрску развёз капітана на фінішнай лініі. Сяргею Папку заставалася толькі прадэманстраваць свае спрынтарскія якасці. Што ён і зрабіў, пакінуўшы ззаду італійца Андрэа Паліні (Skydive) і бельгійца Маціяса Ляглі (Veranclassic) і атрымаўшы другую перамогу на Sharjah Tour.

Станіслаў Бажкоў перасек фінішную рысу чацвёртым, Аляксандр Галаваш быў 44-м, Канстанцін Клімянкоў - 46-м, Яўген Собаль - 76-м, Антон Івашкін - 79-м.

У выніковай генеральнай класіфікацыі Станіслаў Бажкоў размясціўся на трэцяй пазіцыі. Услед за тандэмам з дубайскай каманды Skydive - мараканцы Адзілам Джэлулам і гішпанцам Франсіска Мансэба.

У топ-20 агульнага заліку фінішавалі яшчэ тры прадстаўнікі «Мінска». Аляксандр Галаваш стаў 6-м, Канстанцін Клімянкоў - 12-м, Сяргей Папок - 16-м.

Не было роўных гоншчыкам «Мінска» у балавай класіфікацыі. Станіслаў Бажкоў набраў 55 балаў і захаваў зялёную майку, а Сяргей Папок заняў другое месца.

Акрамя таго, Станіслаў Бажкоў скончыў гонку на другой пазіцыі ў горным заліку.

У камандным першынстве «Мінск» фінішаваў трэцім, прапусціўшы наперад эмірацкі Skydive і сінгапурскі Singha.

На гэтым спаборніцкая праграма беларускай каманды ў ААЭ не скончылася. 29 кастрычніка «Мінск» выйдзе на старт міжнароднай аднадзённай велагонкі «Кубак ААЭ» (1.1), якая пройдзе там жа ў Шарджы.