Піянткоўскі: Стратэгічна Расея вайну ва Украіне ўжо прайграла

Пастанова Гаагскага трыбунала адкрывае магчымасць для пераследу кіраўнікоў РФ за вайсковыя злачынствы.

Заключэнне Міжнароднага крымінальнага суда (МКС), які прызнаў акупацыю Крыма раўназначнай вайне паміж Украінай і Расеяй, стварае юрыдычную базу для абвінавачвання расейскага кіраўніцтва ў вайсковых злачынствах у Крыме і на Данбасе. Пра гэта ў каментары выданню gordonua.com заявіў расейскі палітолаг і публіцыст Андрэй Піянткоўскі.

«Гэта рашэнне адкрывае магчымасць для крымінальнага пераследу кіраўнікоў РФ у абвінавачванні ва ўчыненні вайсковага злачынства і агрэсіі. Наратыў, які Масква хацела падаць грамадскай думцы, што ў Крыме і на Данбасе – унутраны канфлікт ва Украіне, абурэнне даведзеных да адчаю шахцёраў і трактарыстаў і жорсткае падаўленне яго Узброенымі сіламі Украіны. Зараз дадзеная юрыдычная трактоўка: гэта вайсковыя дзеянні паміж дзвюма дзяржавамі. Прычым абсалютна ясна, хто з'яўляецца агрэсарам і чые войскі апынуліся на тэрыторыі іншай краіны», – адзначыў палітолаг.

Ён падкрэсліў, што калі кажа пра абвінавачванне расейскага кіраўніцтва ў вайсковых злачынствах, мае на ўвазе не толькі прэзідэнта Уладзіміра Пуціна.

«Першыя асобы – прэзідэнт і прэм'ер-міністр. Вядома, ужо ні пры чым наш «айфончык» (так карыстальнікі сацыяльных сетак называюць Дзмітрыя Мядзведзева. – рэд.), але ён жа быў прэм'ер-міністрам. Калі ўспомніць Нюрнбергскі працэс, то на лаве падсудных таксама было вышэйшае вайсковае кіраўніцтва. Значыць, міністр абароны Сяргей Шайгу і начальнік Генштаба Валерый Герасімаў.

Яшчэ судзілі міністра замежных спраў Нямеччыны, якога, дарэчы, першым павесілі. Вялікае прывітанне Сяргею Лаўрову. Дадам, быў прысуджаны да смяротнага пакарання вядомы публіцыст і кіраўнік газеты Юліус Штрайхер. Так што прапагандысты Дзмітрый Кісялёў і Уладзімір Салаўёў таксама могуць апынуцца на працэсе», – сказаў Піянткоўскі.

На думку экспэрта, судовы працэс у вайсковых злачынствах ва Украіне цалкам рэальны, але стане магчымым толькі пасля падзення рэжыму ў РФ.

«Такі судовы працэс стане магчымым пасля паразы Расеі і падзення пуцінскага рэжыму. Калі адбудзецца? Можа, праз некалькі гадоў, а можа, праз некалькі месяцаў. Ясна, што стратэгічна Расея вайну ва Украіне ўжо прайграла. Калі гэта будзе аформлена як параза рэжыму (думаю, яшчэ пры нашым жыцці), тады і ўсе працэсы запрацуюць. А юрыдычную базу для гэтага трэба ствараць ужо сёння. І гэта рашэнне МУС прынцыпова важнае», – падкрэсліў суразмоўца.

Нагадаем, 14 лістапада апублікаваная папярэдняя справаздача канцылярыі Міжнароднага крымінальнага суда ў справе «Сітуацыя ва Украіне». У дакуменце Гаагскага трыбунала паказваецца, што «сітуацыя на тэрыторыі Крыма і Севастопаля раўназначная міжнароднаму ўзброенаму канфлікту паміж Украінай і Расейскай Федэрацыяй».

Міжнародны крымінальны суд дзейнічае на падставе Рымскага статута, прынятага ў 1998 годзе і ўвайшоў у дзеянне з 2002 года. Суд, які базуецца ў Гаазе, разглядае злачынствы супраць чалавечнасці, выпадкі генацыду і вайсковыя злачынствы. Пры гэтым юрысдыкцыя суда распаўсюджваецца толькі на тыя дзяржавы, якія ратыфікавалі Рымскі статут.

Украіна падала ў МУС два звароты аб прызнанні юрысдыкцыі суда ў справах, звязаных з падзеямі на Майдане, у Крыме і на ўсходзе Украіны.