Прэзідэнту Калумбіі ўручылі Нобелеўскую прэмію міру
- 10.12.2016, 17:22
- 25,519
Хуан Мануэль Сантас атрымаў прэстыжную прэмію за спыненне больш чым паўвекавой грамадзянскай вайны ў краіне.
У сталіцы Нарвегіі Осла адбылася ўрачыстая цырымонія ўручэння Нобелеўскай прэміі міру калумбійскаму прэзідэнту Хуану Мануэлю Сантасу, паведамляе расейская служба BBC.
Калумбійскі палітык атрымаў гэтую прэстыжную ўзнагароду за свой унёсак у падпісанне пагаднення аб міры з леварадыкальнай групоўкай ФАРК, паклаўшы тым самым канец грамадзянскай вайне, якая доўжылася 52 гады і ў якой загінулі больш за 200 тысяч чалавек.
Сантас атрымаў залаты медаль, грамату і чэк на 8 млн швэдскіх крон (870 тысяч даляраў).
Нобелеўскі камітэт ацаніў працу Сантаса як рухальную сілу мірнага пагаднення, падпісанага ў лістападзе 2016 года паміж урадам Калумбіі і баевікамі.
У суботу адбудзецца і ўзнагароджанне іншых нобелеўскіх лаўрэатаў гэтага года, але не ў Осла, а ў Стакгольме, дзе звычайна праходзіць гэтая цырымонія.
Вядома, што на ёй не будзе лаўрэата гэтага года ў літаратуры - амерыканскі спявак Боб Дылан адмовіўся прысутнічаць на імпрэзе. На ягоную просьбу атрымае ўзнагароду спявачка Пэці Сміт.