Украіна павялічыла антырасейскія санкцыі
2- 29.12.2016, 21:25
- 10,268
Новыя санкцыі супраць РФ уведзеныя праз працяг гібрыднай агрэсіі супраць Украіны.
Рада нацыянальнай бяспекі і абароны (РНБА) Украіны ўвяла дадатковыя санкцыі супраць расейскіх фізічных і юрыдычных асоб, перадае тэлеканал «112 Украина»..
«Праз працяг гібрыднай агрэсіі РФ супраць Украіны Рада нацыянальнай бяспекі і абароны Украіны ўвяла дадатковыя санкцыі супраць фізічных і юрыдычных асоб дзяржавы-агрэсара», - заявілі ў прэс-службе РНБА пасля пасяджэння, якое адбылося ў чацвер.
Сярод іншага, санкцыі распаўсюджаныя на дэпутатаў Дзяржаўнай думы сёмага склікання, што абіраліся ў склад заканадаўчага органа ў Крыме і Севастопалі, чальцоў выбарчых камісій, а таксама прадпрыемстваў, якія былі перарэгістраваныя паводле расейскага заканадаўства.
Таксама ў РНБА заявілі, што ў санкцыйны спіс трапілі былыя кіраўнікі Украіны, якія хаваюцца за мяжой і «датычныя да фінансавання тэрарыстычнай дзейнасці і гібрыднай агрэсіі РФ супраць Украіны». Акрамя таго, абмежаванні закрануць «падкантрольныя Расеі юрыдычныя асобы, якія маюць дачыненне да вядзення Расеяй гібрыднай вайны супраць Украіны ў інфармацыйнай сфэры і кібэрпрасторы».
Таксама санкцыі былі ўведзеныя супраць «службовых асоб расейскіх праваахоўных органаў і судоў, якія маюць дачыненне да незаконнага затрымання ўкраінскіх грамадзян у Расеі», заявілі ў РНБА.