Прэзідэнт Кыргызстана ўзяў адпачынак на неабвешчаны тэрмін
5- 5.12.2016, 9:14
- 21,441
У Алмазбека Атамбаева былі запланаваныя важныя мерапрыемствы.
Прэзідэнт Кыргызстана Алмазбек Атамбаеў з панядзелка сышоў у працоўны адпачынак, паведамілі ў адміністрацыі кіраўніка дзяржавы.
Пры гэтым у ведамстве не ўдакладнілі, як доўга будзе доўжыцца адпачынак прэзідэнта. На прэс-канферэнцыі 1 снежня Атамбаеў заявіў, што найбліжэйшы час плануе ўзяць адпачынак, каб заняцца падрыхтоўкай новай стратэгіі развіцця краіны.
У канцы гэтага тыдня, 11 снежня, у рэспубліцы адбудзецца рэферэндум па ўнясенні змяненняў у канстытуцыю і выбары дэпутатаў мясцовых саветаў. У дзень выбараў паводле традыцыі кіраўнік дзяржавы пасля галасавання выходзіць для камунікацыі з прэсай. Акрамя гэтага, у другой палове снежня ў прэзідэнта Кыргызстана запланаваны дзяржаўны візіт у Індыю і ўдзел у паседжанні кіраўнікоў дзяржаў АДКБ.
Сёлета прэзідэнт Кыргызстана некалькі разоў браў кароткатэрміновыя адпачынкі, адзін з іх быў вымушаным праз хваробу, бо ў канцы верасня ў Атамбаева на шляху ў Нью-Ёрк узніклі праблемы з сэрцам, і ён прайшоў лячэнне ў маскоўскай клініцы.
Раней Алмазбек Атамбаеў папрасіў Расею зачыніць вайсковую базу ў Кыргызстане, калі завершыцца дамова. Ён лічыць, што расейцы павінны сысці з краіны ўслед за амерыканцамі.