Анатоль Капскі: Каманда павінна быць драпежнікам і забіраць сваё
1- 5.12.2016, 11:36
- 18,066
Сезон, які завяршыўся, для футбалістаў БАТЭ быў пераможным у чэмпіянаце краіны, аднак у цэлым мог быць больш удалым.
Пра гэта ў праграме «Контуры» на тэлеканале АНТ распавёў генеральны дырэктар ААТ «Барысаўскі завод аўтатрактарнага электраабсталявання» — кіруючая кампанія холдынгу «Аўтакампаненты», старшыня праўлення БАТЭ Анатоль Капскі:
- Мы сталі чэмпіёнамі — гэта самае галоўнае, але мы ў неаплатным даўгу перад нашымі заўзятарамі. Асабіста для мяне мінулая восень без еўракубкаў — гэта перыяд ліхалецця. Чарговы сезон мы аднясем да пераможнага, але таксама і да няўдалага, таму што ўсе праблемы толькі ў нас. Каманда павінна быць «драпежнікам» і павінна забіраць сваё. На жаль, у нас пачуццё і жаданне перамог прытупілася.
Функцыянер таксама станоўча ацаніў з'яўленне ў вышэйшай лізе чэмпіянату краіны новых клубаў:
- У тым, што «Крумкачы», напрыклад, згулялі досыць паспяхова для пачаткоўца, ёсць заслуга ФК БАТЭ. Уся справа ў тым, што да нас звяртаюцца розныя клубы. Наш клуб зарабляе на еўракубках, і пасля мы дзелімся і ведамі, а часам дапамагаем нават вырашаць нейкія часовыя фінансавыя цяжкасці, — распавёў Капскі. — Да таго, што прыходзяць новыя клубы, я стаўлюся станоўча, але, з іншага боку, гэтыя клубы павінны разумець, што, выходзячы на новы ўзровень, павышаецца і ўзровень выдаткаў. Я вітаю развіццё іншых клубаў, развіццё чэмпіянату, але вельмі негатыўна стаўлюся да таго, што чэмпіянат спрабуюць зраўнаваць, ствараючы дадатковыя праблемы БАТЭ.