У спіс «экстрэмісцкіх» матэрыялаў трапіла старонка менскага лекара

Акрамя гэтага, пад забарону трапіў сайт «Анархісцкай групы Прамень».

Нацыянальны спіс экстрэмісцкіх матэрыялаў папоўніўся некалькімі дзясяткамі інтэрнэт-адрасоў. Абноўлены спіс апублікавала «Советская Белоруссия».

Пад забарону патрапілі сайт «Анархісцкай групы Прамень» ды інтэрнэт-рэсурс «Рэвалюцыйнае дзеянне». Таксама ў пералік дадаліся матэрыялы з сацыяльных сетак — відэа, аўдыёзапісы, нататкі і цэлыя супольнасці.

Ёсць у спісе і персанальныя старонкі ў сацыяльных сетках. Сярод іх — старонка «ВКонтакте» менскай студэнткі Кацярыны Вернер, а таксама старонка ў Facebook менскага ўролага Хамада Аль-Саіда.

У спіс экстрэмісцкіх матэрыялаў трапіў шэраг кніг расейскага выдавецтва «Алгоритм», грамадска-палітычнай і гістарычнай накіраванасці. Сярод іншых, гэта кнігі «Загадка сіёнскіх пратаколаў», «Таемны сусветны ўрад», «Расейскі супраціў» Алега Платонава, «Ярмо юдэйскае» Барыса Міронава. Пад забаронай і шэраг выданняў «Праваслаўнай ініцыятывы», такія, як «Няма дрэнных народаў», «Прысуд забойцам Расеі» Міронава і г.д.