Прэм'ер Францыі абвясціў аб намеры балатавацца ў прэзідэнты

Кіраўнік французскага ўрада Мануэль Вальс абвясціў, што вылучыць сваю кандыдатуру для выбараў у прэзідэнты.

Прэм'ер-міністр Францыі Мануэль Вальс мае намер балатавацца на выбарах прэзідэнта краіны, якія пройдуць у два раўнды 23 красавіка і 7 траўня 2017 года. Аб сваёй пастанове стаць кандыдатам у прэзідэнты 54-гадовы сацыяліст Вальс афіцыйна абвясціў у панядзелак, 5 снежня. Адначасова ён паведаміў, што ўжо 6 снежня падасць прашэнне аб адстаўцы з пасады кіраўніка ўрада, паведамляе dw.com.

Французская сацыялістычная партыя вызначыць свайго кандыдата на вышэйшую дзяржаўную пасаду у студзені 2017 года падчас папярэдніх выбараў адпаведна ўзору праймерыз, што ўжо правялі французскія кансерватары з партыі "Рэспубліканцаў". Удзельнічаць у вызначэнні кандыдата ў прэзідэнты ад сацыялістаў змогуць усе грамадзяне Францыі.

Раней пра пастанову ўключыцца ў барацьбу за пасаду кіраўніка дзяржавы абвясцілі сем палітыкаў, у тым ліку былы міністр эканомікі Францыі Арна Мантэбур і экс-міністр адукацыі Бенуа Амон. Акрамя таго, прэтэндаваць на пасаду прэзідэнта Францыі будзе экс-прэм'ер Франсуа Фіён з партыі "Рэспубліканцы".