Актывісты маюць намер вывесіць 200 бел-чырвона-белых сцягоў у Менску

«Малады фронт» хоча зладзіць сапраўднае бел-чырвона-белае свята.

Сёння раніцай моладзевыя актывісты развесілі больш за два дзясяткі бел-чырвона-белых сцягоў у цэнтры Менска.

«Мы вывесілі на праспекце 23 сцягі, а яшчэ два мая дачка Мара сёння вывесіць дома. Як раз атрымаецца 25 сцягоў - у гонар 25-годдзя распаду СССР. Гэтай акцыяй мы адзначылі 25 гадоў развалу імперыі зла. Каб жыхары і госці сталіцы, праязджаючы па горадзе, натхняліся і радаваліся, гледзячы, як бел-чырвона-белыя сцягі лунаюць усцяж праспекта», - сказаў Зміцер Дашкевіч Свабодзе.

На сваёй старонцы ў Facebook Дашкевіч растлумачыў, што першапачаткова планавалася большая колькасць сцягоў, але аўтамабілю, які павінен быў іх прывезці, невядомыя парэзалі колы:

«На 25 сцягоў мы не арыентаваліся і хацелі вывесіць больш. Але калі ўчора Сяргей Пальчэўскі (актывіст «Маладога фронту» - рэд.) сабраўся вылучыцца на нашу загарадную фабрыку ў пашыве сцягоў, ён заўважыў, што ўсе чатыры колы ягонага аўтамабіля прарэзаныя нажом - аднаўленню не падлягаюць. Таму мы сабралі ўсе сцягі, якія былі ў нашых шафах - і вывесілі іх. Так і атрымаецца - 25 сцягоў на 25 гадоў развалу імперыі зла».

Лідар «Маладога фронту» заклікаў ахвяраваць сродкі, каб у наступны раз сцягоў было больш і атрымалася «дзівоснае бел-чырвона-белае свята».

«Калі вы хочаце, каб у наступны раз маладафронтаўцы вывесілі не 25 сцягоў, а 100 ці 200, трэба скідацца на колы і тканіны. Колы на аўтамабіль каштуюць не менш за 300 у.а., і адзін Сяргей гэтага не пацягне, тканіна ў ЦУМе таксама каштуе грошай. Заклікаю ўсіх, хто можа, дапамагчы нам сабраць сродкі. І калі мы разам усе пастараемся, гарантую вам у наступны раз у Менску дзівоснае бел-чырвона-белае свята!».