КДБ прымушае мантажора прызнацца ў супрацоўніцтве з «Белсатам»
12- 12.02.2016, 9:17
- 36,910
На працу да відэамантажора прыйшоў «Андрэй Андрэевіч» з КДБ і запатрабаваў прызнацца ў супрацоўніцтве з незалежным тэлеканалам.
КДБ аказвае ціск на супрацоўніка СТВ Аляксандра Шымко, пагражаючы звальненнем з тэлевізіі з «воўчым білетам». Такім чынам камітэт спрабуе дамагчыся ад яго прызнання ў супрацоўніцтве з «Белсатам», паведамляе тэлеканал.
Чалавек у цывільным, які прадставіўся «супрацоўнікам дзяржбяспекі» Андрэем Андрэевічам, прыйшоў да інжынера відэамантажу СТВ Аляксандра Шымко на працу. Пагражаючы звальненнем, «Андрэй Андрэевіч» патрабаваў, каб Аляксандр прызнаўся ў супрацоўніцтве з тэлеканалам «Белсат» і каб паведамляў ім пра ўсе свае працы ў мантажу відэа.
На наступную раніцу Андрэй Андрэевіч сустрэў Аляксандра Шымко каля крамы і спрабаваў яго прымусіць да паездкі ў КДБ, каб правесці аналіз на паліграфе. Відэаінжынер адмовіўся ехаць без позвы - тады супрацоўнік КДБ даў яму падпісаць «прадпісанне» аб абавязанні прыехаць у пятніцу 12 лютага ў КДБ па адрасе вул. Камсамольская, 30. У загадзе было ўказана, што ў выпадку няяўкі яму пагражае штраф ад 20 да 50 базавых ставак.
«Апошнім часам мы назіраем рост увагі спецслужбаў Беларусі да незалежных медыя», - пракаментаваў сітуацыю кіраўнік юрыдычнай камісіі Беларускага Хельсінкскага камітэта (БХК) Гары Паганяйла.