Лукашэнка прапанаваў Ярмошынай «сцісла» абмеркаваць парады АБСЭ

З 1996 года назіральнікі АБСЕ ні разу не прызналі «выбары» ў Беларусі празрыстымі і дэмакратычнымі.

Аляксандр Лукашэнка даручыў у самыя кароткія тэрміны стварыць міжведамасную экспэртную групу для вывучэння рэкамендацый АБСЕ і выпрацоўкі прапаноў для ўжывання гэтых рэкамендацый.

Такую задачу ён паставіў сёння на сустрэчы са старшынёй Цэнтральнай камісіі ў выбарах і правядзенні рэспубліканскіх рэферэндумаў Лідзіяй Ярмошынай, паведамляе БелТА.

«Ёсць неабходнасць абмеркаваць сцісла вынікі прэзідэнцкіх выбараў вачыма БДІПЧ АБСЕ», - сказаў Лукашэнка.

Ён звярнуў увагу на тое, што выніковая справаздача БДІПЧ АБСЕ аб «прэзідэнцкіх выбараў» 2015 года ў Беларусі была прадстаўленая як ніколі позна - праз 3,5 месяцы пасля выбараў.

«Доўга рыхтавалі. Праўда, яна ў асноўным, як я заўважыў, нічым не адрозніваецца ад папярэдняй. Але ёсць нейкія прапановы, патрабаванні да нас», - адзначыў Лукашэнка.

Лідзія Ярмошына распавяла, што міжведамасная экспэртная група будзе створаная ўжо сёння, а першае пасяджэнне плануецца правесці 16 лютага. Экспэртная група будзе працаваць пад кіраўніцтвам Цэнтрвыбаркама і праз месяц з пачатку працы павінна прадставіць на адрас ЦВК рэкамендацыі прапановы па той пазіцыі, якую выказала АБСЕ.

Як адзначыла Лідзія Ярмошына ў размове з журналістамі, ЦВК абагульніць высновы міжведамаснай экспэртнай групы і прадставіць кіраўніку напярэдадні «парламенцкіх выбараў» прапановы аб ўдасканаленні выбарчага працэсу.

«Аднак адразу магу сказаць, што, вядома, гаворка не можа ісці ў найбліжэйшы час аб змене выбарчага закона. Гэтыя прапановы будуць рэалізоўвацца шляхам удасканалення правапрымяняльнай практыкі, якая вызначаецца метадычнымі тлумачэннямі Цэнтрвыбаркаму», - падкрэсліла старшыня ЦВК.

Лідзія Ярмошына звярнула ўвагу на тое, што пажаданне міжнародных партнёраў было ў тым ліку і ў тым, каб Беларусь максімальна сур'ёзна паставілася да гэтых рэкамендацый. «І гэта дэманстрацыя перш за ўсё нашай сур'ёзнасці, нашай ўважлівасці», - сказала яна.