Турцыя і Саудаўская Арабія рыхтуюцца да наземнай аперацыі ў Сірыі

Турцыя і Саудаўская Арабія могуць пачаць наземную аперацыю супраць джыхадзісцкай групоўкі «Ісламская дзяржава» (ІД) у Сірыі.

Пра гэта заявіў міністр замежных спраў Турцыі Меўлют Чавушоглу турэцкім СМІ ў самалёце, вяртаючыся ў Анкару з Мюнхенскай міжнароднай канферэнцыі ў пытаннях бяспекі ў суботу, 13 лютага, паведамляе Немецкая волна.

«Калі будзе распрацавана стратэгія (барацьбы супраць ІД), то Турцыя і Саудаўская Арабія могуць уступіць у наземную аперацыю», - сказаў ён.

Чавушоглу паведаміў, што ўрад у Эр-Рыядзе таксама перакідвае баявыя самалёты на турэцкую авіябазу «Інджырлік», якой карыстаецца авіяцыя ЗША для нанясення бомбавых удараў па пазіцыях ІД у Сірыі.

«Яны (саудаўскія афіцыйныя асобы) прыехалі, пазнаёміліся з базай. Цяпер яшчэ не ясна, колькі менавіта саудаўскіх самалётаў прыбудзе ў «Інджырлік», - адзначыў кіраўнік турэцкага МЗС.

Ён паведаміў, што Турцыя таксама спрабуе перазагрузіць стасункі з Аб'яднанымі Арабскімі Эміратамі (ААЭ).

Пытанне аб магчымасці ўдзелу Саудаўскай Арабіі ў наземнай аперацыі ў Сірыі абмяркоўваецца ў той час, калі сусветныя дзяржавы спрабуюць дамовіцца аб частковым спыненні агню ў сірыйскім канфлікце.

Дзяржсакратар ЗША Джон Кэры папярэдзіў, што сябры сусветнай супольнасці не будуць сядзець склаўшы рукі, калі дамоўленасць аб спыненні агню ў Сірыі не будзе выкананая і не выключыў магчымасці з'яўлення ў Сірыі «дадатковых замежных войскаў».

Са свайго боку міністр абароны ЗША Эштан Картэр напярэдадні заявіў, што ААЭ гатовыя аднавіць удзел у паветраных налётах на пазіцыі ІД у Сірыі. Адначасова кіраўнік амерыканскай вайсковай установы падкрэсліў ключавую ролю ААЭ і Саудаўскай Арабіі ў барацьбе супраць «Ісламскага дзяржавы» ў Сірыі.