Разведка: РФ даслала ў Данбас эшалоны з узбраеннем і наймітамі
10- 13.02.2016, 17:14
- 26,106
Расея даслала падмацаванне асабовым складам, узбраеннем і вайсковай тэхнікай, боепрыпасамі і ГЗМ баевікам у Данбасе.
Пра гэта інфармуе Галоўная ўправа разведкі Мінабароны Украіны, паведамляе «Украинская правда».
«Зафіксаванае прыбыццё на чыгуначную станцыю Ілавайск - двух эшалонаў з вайсковай тэхнікай (15 платформаў), дызельным палівам (да 180 тон), боепрыпасамі і матэрыяльна-тэхнічнымі сродкамі (10 вагонаў), у раён Бокава-Платава (заходні прыгарад Антрацыта) - расейскіх наймітаў», - гаворыцца ў паведамленні.
Пасля баявога ўпарадкавання ў складзе падраздзяленняў (узвод-рота) імі будуць даўкамплектаваныя злучэнні і часткі 2 АК.
Акрамя таго, у штабе АТА раней паведамілі, што ў Харцызск Расея паставіла 200 тон боепрыпасаў да забароненых менскімі дамовамі 122-мм і 152-мм артылерыйскіх сістэм, танкаў і ручных супрацьтанкавых гранатамётаў.
«У Ілавайск - 240 тон дызельнага паліва і тры платформы з вайсковай тэхнікай, і ў Луганск - да 300 тон боепрыпасаў», - адзначылі ў штабе АТА.
Таксама паводле звестак штаба АТА расейскія вайскоўцы і баевікі праводзяць узмоцненыя вучэнні: побач з Шыракіно баевікі і расейскія вайскоўцы, якія ўваходзяць у так званы «9-ты асобны мотастралковы полк ДНР», які размешчаны ў Новаазоўску, правялі стрэльбы з адпрацоўкай высадкі дэсанту на ўзбярэжжы Азоўскага мора.
У раёне мыса Опук на ўзбярэжжы Чорнага мора расейскі флот і дэсантнікі трэніраваліся весці марскую дэсантную аперацыю.
Паводле звестак выведкі Мінабароны, 3 асобная мотастралковая брыгада (Горлаўка) 1 АК вядуць змены маркіроўкі забароненага ўзбраення і вайсковай тэхнікі, у першую чаргу, са складу УС РФ, з мэтай утойвання фактаў парушэння Менскіх дамоўленасцей.
Таксама ўстаноўлена, што ў складзе 5 асобнай мотастралковай брыгады (Абільнае) у раёне Мар’інкі дзейнічае падраздзяленне УС РФ «Белы мядзведзь».
«Цягам дня праціўнік панёс страты ў асабістым складзе: адзін вайсковец УС РФ загінуў (Валерый Маскалец) і адзін атрымаў раненні падчас вылучэння ў складзе дыверсійнай разведвальнай групы ў раёне населенага пункта Зайцава», - адзначылі ў ГУР Мінабароны.