Славенія абмяжоўвае ўезд уцекачоў

Услед за Аўстрыяй Славенія мае намер прыняць захады для скарачэння наплыву мігрантаў.

Славенія мае намер абмежаваць уезд уцекачоў, паведаміла 14 лютага Міністэрства ўнутраных спраў краіны. МУС указала, што аб планах Любляны ўжо паведамілі Харватыі, з якой Славенія мяжуе на паўночным усходзе. Падрабязнасцяў установа не называе, паведамляе Немецкая волна.

Адзначаецца толькі, што, робячы гэты крок, Любляна пераймае прыклад суседняй Аўстрыі, якая раней абвясціла аб узмацненні жорсткасці правіл прыёму ўцекачоў.

Паводле звестак славенскай тэлевізіі, Любляна мае намер з 15 лютага прапускаць на сваю тэрыторыю ўцекачоў з такім разлікам, каб штодня мяжу з Аўстрыяй перасякалі не больш тысячы ўцекачоў.

Прадстаўнік МУС Аўстрыі паведаміў у інтэрв'ю агенцтву AFP, што «цягам тыдня будзе абвешчаны шэраг больш жорсткіх захадаў, уключаючы штодзённую квоту на мігрантаў».

Урадавая кааліцыя Аўстрыі ў канцы студзеня прыняла пастанову, што ў 2016 годзе краіна зможа прыняць 37 500 мігрантаў, якiя просяць аб выдаванні прытулку, а да 2019 года іх колькасць складзе не больш за 127 500 чалавек.

Акрамя таго, Вена ўзвяла на мяжы са Славеніяй загароду даўжынёй 3,7 кіламетра. Агароджа была пабудаваная ў раёне пераходу Шпільфельд, праз які праходзіць самая вялікая колькасць мігрантаў. Як адзначае AFP, цягам тыдня Вена плануе аб'явіць ліміт на прыём уцекачоў, якія праходзяць менавіта праз гэты прапускны пункт.