Менскі дырэктар бясплатна адгружаў аўтатэхніку ва Украіну

За гэта супраць яго распачалі крымінальную справу.

Намеснік генеральнага дырэктара ў камерцыйных пытаннях менскага машынабудаўнічага прадпрыемства адгружаў аўтамабільную тэхніку неплацежаздольнай украінскай фірме.

Пра гэта БелТА паведамілі ў аддзеле інфармацыі і грамадскіх сувязяў ГУУС Мінгарвыканкама.

«Намеснік гендырэктара, ведаючы аб неплацежаздольнасцi контрагента, даў указанне на адгрузку аўтамабільнай тэхнікі на яго адрас. Гэта пацягнула ўтварэнне дэбіторскай запазычанасці на Br250 млрд. Зварот названай сумы знаходзіцца пад вялікім пытаннем», - адзначылі ў ГУУС.

Першапачаткова пастаўка павінна была весціся толькі пасля выдачы пакупніком банкаўскай гарантыі. Але ўкраінскай фірме службовая асоба наважыла даць адтэрміноўку 15 дзён.

Па сканчэнні гэтага тэрміна контрагент менскага прадпрыемства так і не даў банкаўскай гарантыі, аднак адгрузкі тавару прадоўжыліся. Генеральная пракуратура Беларусі распачала крымінальную справу паводле ч.3 арт.424 Крымінальнага кодэкса Беларусі (злоўжыванне ўладай або службовымі паўнамоцтвамі).