Праз «транзітныя войнаў» пакутуюць беларускія кіроўцы
8- 15.02.2016, 17:59
- 20,130
Беларусаў без праблем пускаюць і ва Украіну, і ў Літву, але чэргі і блакады аб'ехаць немагчыма.
Ужо пяты дзень запар на мяжы Украіны з Еўразвязам актывісты праводзяць акцыю, накіраваную супраць расейскіх фур. Яны абвясцілі аб стварэнні блок-пастоў «для процідзеяння і недапушчэння ва Украіну гандлёвага транспарту расейскіх акупантаў».
Такім чынам, расейскім грузавікам быў фактычна перацяты праезд у некалькіх кірунках - у Румынію, Вугоршчыну і Славакію яны не могуць трапіць праз дзеянні ўкраінскіх актывістаў, а ў Польшчу - праз расейска-польскі канфлікт вакол дазволаў на грузаперавозкі.
У выніку адзіным акном для расейскіх кіроўцаў засталася беларуска-літоўская мяжа, дзе з'явілася чарга з сотняў фур.
Як распавёў прадстаўнік Беларускай асацыяцыі аўтамабільных міжнародных перавозчыкаў (БАМАП) Міхаіл Казлоў, праз сітуацыю, якая склалася беларусы пакутуюць як на ўкраінскай мяжы, так і на беларускай, піша «Салiдарнасць».
- Трэба разумець, што такое на ўкраінскім боку пад'езд да пункта пропуску Дамачава, - растлумачыў ён. - Там стаяць расейскія фуры - мітынгуюць, побач стаяць людзі ў камуфляжнай форме. Як беларусу аб'ехаць увесь гэты бардак і пад'ехаць да пункта пропуску?
Са слоў суразмоўцы, усе праблемы сёння звязаныя з блакаваннем пад'езда, «а так беларусу без пытанняў можна праехаць - калі ласка, браткі, едзьце»:
- Даходзіць да таго, што даводзіцца ехаць на Новую Гуту, перціся праз усю Украіну ў аб'езд, - сказаў Міхаіл Казлоў.
У Беларусі перавозчыкі таксама пакутуюць - ужо праз небывалы наплыў расейцаў.
- Яны стаяць і ў Каменным логу, і ў Катлоўцы, і Беняконях у чарзе - там немагчыма яе аб'ехаць, - заўважыў прадстаўнік БАМАП.
Са слоў суразмоўцы, расейскія кіроўцы цяпер могуць трапіць з Літвы ў Еўропу толькі на пароме, дзе «чарга распісаная ўжо на тыдзень наперад». Такая сітуацыя для беларусаў, якія могуць без праблем трапіць на тэрыторыю Польшчы, магла б стаць «залатой жылай», але расейцы адмаўляцца ад грузаў пакуль не спяшаюцца.
- Столькі ў нас складоў, лагістычных цэнтраў пабудавана! Можна было б выгрузіць гэты тавар, перадаць беларусам, а мы ўжо без праблем давязём яго ў Еўропу. Але яны пакуль не хочуць, думаюць, што гэтая сітуацыя хутка зменіцца - у выніку пакуль пакутуюць усе.