Павел Севярынец: Прадпрымальнікі будуць на Дні Волі

Многія прадпрымальнікі ўжо палітычна «свядомыя», мяркуе апазіцыйны палітык.

Сустаршыня аргкамітэта для стварэння партыі «Беларуская хрысціянская дэмакратыя» Павел Севярынец пракаментаваў сайту charter97.org акцыю пратэсту ІП каля Дому ўраду, якая прайшла 14 сакавіка.

«Некалькі сотняў людзей выйшла да Дома ўрада і гэта ўжо вялікі плюс! Многія з іх здолелі пераадолець свой страх. Многія прыязджалі на такія акцыі раней.

Я думаю, што гэта адна з многіх акцый, якія былі і яшчэ будуць, і да якіх беларусам трэба далей далучацца», - распавёў charter97.org апазіцыйны палітык.

«Атмасфера на акцыі была выдатная. Тыя людзі, якія выйшлі, мне здаецца, цалкам разумеюць, што пастановы ў Беларусі прымаюцца не ў міністэрствах, а адным чалавекам. І гэтага чалавека даўно пара ў адстаўку! Гэта адчувалася ў тым, як пратэстоўцы рэагавалі на выступы. Прапанову адправіць у адстаўку вышэйшае кіраўніцтва Беларусі прысутныя сустракалі гучнымі воплескамі!» - Падзяліўся ўражаннямі Севярынец.

«Людзі разумеюць, што трэба мяняць рэжым. Многія прадпрымальнікі ўжо палітычна «свядомыя». Я думаю, што 25 сакавіка сотні ІП будуць на Дні Волі», - распавёў палітык.

Павел Севярынец адзначыў, што 21 сакавіка, у наступны панядзелак, пройдзе пасяджэнне Камітэта для выратавання прадпрымальніцтва. На ім лідары прадпрымальніцкага руху і прадстаўнікі ІП з рэгіёнаў будуць думаць, што рабіць далей.

«Магчыма, там будзе больш дакладна абмяркоўвацца 25 сакавіка і наступныя акцыі пратэсту», - падзяліўся Севярынец.