Не выкананы ніводны паказчык мінулай «пяцігодкі»

У мінулую пяцігодку ніводны з адзінаццаці найважнейшых паказчыкаў сацыяльна-эканамічнага развіцця Беларусі не быў выкананы.

Гэта вынікае з праекта праграмы сацыяльна-эканамічнага развіцця на 2016-2020 гады.

У дакуменце, з якім удалося азнаёміцца БелаПАН, прыведзены вынікі выканання важнейшых паказчыкаў папярэдняй праграмы, якая сцвярджалася на 2011-2015 гады.

Меркавалася, між іншым, што за гэты перыяд УБП павялічыцца на 62-68%, аднак паводле факта ён павялічыўся толькі на 5,9%.

Прамысловая вытворчасць за пяць гадоў вырасла на 4,6% пры заданні 54-60%, прадукцыйнасць працы - на 10,7% замест запланаваных 63-68%.

Не былі таксама выкананы заданні па васьмі іншых найважнейшых паказчыках сацыяльна-эканамічнага развіцця: тэмпы росту экспарту, інвестыцыі ў асноўны капітал, жыллёвае будаўніцтва, рэальныя даходы насельніцтва. Так, за апошнія пяць гадоў рэальныя даходы насельніцтва выраслі на 32,7%, хоць меркавалася павелічэнне на 70-76%.

Між тым праект праграмы сацыяльна-эканамічнага развіцця Беларусі на 2016-2020 гады прадугледжвае павышэнне канкурэнтаздольнасці эканомікі і выхад на тэмпы эканамічнага росту вышэй за сярэднесусветныя. Чакаецца, што рост УБП у 2020 годзе складзе 3,5% (у Расеі - 2,8%, у ЕЗ - 2%).

Праект праграмы сацыяльна-эканамічнага развіцця да 2020 года падрыхтаваны з улікам прагназуемага павелічэння сусветных коштаў нафты да 65 даляраў за барэль у 2020 годзе (цяпер кошт барэля складае 42 даляры).

Паводле ацэнкі экспэртаў, задача па росту УБП, якую ўлады плануюць зацвердзіць на найбліжэйшыя пяць гадоў, мае ў асноўным ідэалагічны характар.

«Мэта росту УБП - нязменны фетыш беларускай сістэмы кіравання, - кажа эканаміст Антон Балточка. - На дзяржаўным узроўні гэта ўсё той жа дырэктыўны паказчык. Дзяржаве дзякуючы адной лічбе прасцей растлумачыць насельніцтву свае планы».

Як мяркуе экспэрт, гэта разумее абсалютная большасць дзяржслужбоўцаў. «Пасля таго як у папярэднія гады мы ўвесь час не выконвалі прагнозы УБП, цяпер мала хто верыць у іх дасягненне. Ва ўрадзе, на ўзроўні мясцовых чыноўнікаў, будуць глядзець на гэтую мэту як на ідэалагічную задачу, якая з эканамічнай рэчаіснасцю мае мала агульнага», - адзначыў эканаміст.