Лукашэнка: Брыдка слухаць, што ў нас тут ледзь не мяккая беларусізацыя
44- 21.04.2016, 14:17
- 12,385
Хаўрусніцай і стратэгічным партнёрам Беларусі была і застаецца Расея, заявіў дыктатар.
"Расейская Федэрацыя - гэта наша хаўрусніца і стратэгічны партнёр. Нам варта дынамічна развіваць супрацоўніцтва на міждзяржаўным і рэгіянальным узроўні", - заявіў Лукашэнка падчас свайго традыцыйнага паслання.
"Быць ці не быць з Расеяй - у адрозненне ад Расеі, мы развязалі гэтае пытанне на рэферэндуме ў свой час. І гэтым шляхам мы заўсёды ідзём", - падкрэсліў беларускі дыктатар.
Ён адзначыў, што не ўсім паведамленням СМІ аб тым, што адбываецца ў Беларусі, трэба верыць, паведамляе Інтэрфакс.
"Агідна слухаць з некаторых ангажаваных расейскіх "рупараў", што ў нас тут ледзь не мяккая беларусізацыя, што ў нас яшчэ штосьці тут адбываецца, ледзь не разварот куды-небудзь", - заўважыў Лукашэнка.
"Я не ведаю, куды нам разгортвацца. Мы былі і ёсць браты. І не Лукашэнку, не парламенту Беларусі гэта вызначаць - гэта гістарычна, стагоддзямі наканаванае", - рэзюмаваў ён.