Лявону Вольскаму прысуджана прэстыжная ўзнагарода Freemuse Award
10- 25.04.2016, 11:21
- 10,106
Міжнародная ўзнагарода Freemuse Award уручаецца з 2008 года чалавеку або арганізацыі за выдатную працу на карысць свабоды музычнага выказвання.
Беларускаму рок-музыку Лявону Вольскаму прысуджана ўзнагарода Freemuse Award за 2016 год.
«Яго песні з'яўляюцца гімнамі для тых, хто марыць аб дэмакратычнай і свабоднай Беларусі. Праз гэта Вольскі ўжо шмат гадоў знаходзіцца ў знакамітым «чорным спісе» артыстаў, чые песні не гучаць на радыё і канцэртах, якія не праходзяць у Беларусі», - гаворыцца ў прэс-рэлізе Freemuse Award.
Музыка атрымае ўзнагароду на цырымоніі ў Стакгольме 8 траўня 2016 года.
«Лявон Вольскі працягвае даўнюю традыцыю музыкаў з актыўнай грамадзянскай пазіцыяй, якія ў сваёй творчасці звяртаюць увагу на важныя сацыяльныя і палітычныя пытанні. Яны становяцца сімваламі рухаў за грамадзянскія правы, выказваючы праз сваю музыку расчараванне і надзею», - кажа Оле Рэйтаў (Ole Reitov), выканаўчы дырэктар Freemuse.
Сярод іншых прадстаўнікоў гэтай традыцыі, якія атрымлівалі Freemuse Award, былі Ramy Essam, Pete Seeger, Ferhat Tunc і Tiken Jah Fakoly.
Даведаўшыся аб прысуджэнні ўзнагароды, Лявон Вольскі адзначыў:
«Для мяне вялікі гонар атрымаць Freemuse Award сёлета, і я вельмі ўдзячны за гэта. Музыка з'яўляецца цэнтрам майго жыцця, з яе дапамогай я распавядаю пра тое, за што я люблю Беларусь і пра тое, што мяне ў ёй турбуе. У аснове творчасці ляжыць свабода ў сваёй самай чыстай форме. Без свабоды няма музыкі і няма праўды - няма праўды ў музыцы. Я ўважаю гэта таксама ўзнагародай для ўсіх людзей, якія падтрымліваюць мяне ў Беларусі, у Еўропе і іншых краінах свету, і для ўсіх людзей, якія дапамагаюць захоўваць свабоду мастацкага выказвання».
Некалькі тыдняў таму пайшла з жыцця Ганна Вольская - жонка, мэнэджар і творчая муза Лявона. Музыкант прысвячае сваю ўзнагароду ёй: «Без яе ў мяне не было б сілы і магчымасці пастаянна займацца музыкай, асабліва ў складаныя моманты».
Лявон Вольскі з'яўляецца сольным выканаўцам, а таксама заснавальнікам гуртоў «Мроя», N.R.M., Zet і «Крамбамбуля», кожны з якіх аказаў вялікі ўплыў на развіццё беларускамоўнай рок-музыкі і беларускай культуры агулам.
Узнагарода Freemuse Award уручаецца з 2008 года чалавеку або арганізацыі за выдатную працу на карысць свабоды музычнага выказвання.