У гіпермаркеце Чыжа ProStore пустыя прылаўкі прыхоўваюць плёнкай
19- 26.04.2016, 15:56
- 13,205
Пасля затрымання Юрыя Чыжа ў гандлёвай сетцы прадаўжаюцца праблемы з напаўненнем крам таварам.
«Сёння з сябрам наведалі гіпермаркет у Каменнай горцы, і зафіксавалі яшчэ больш сумную сітуацыю, чым тыдзень таму, калі ўжо было мноства пустых паліц, - распавёў «Салiдарнасцi» чытач Андрэй 26 красавіка. - Прадаўцы заляплялі пустыя прылаўкі чорнай плёнкай і абмотвалі скотчам. Паспрабавалі зняць гэта на тэлефон, але, убачыўшы нашы дзеянні, тыя прыстрашылі выклікам аховы. Так што ўдалося сфатаграфаваць толькі новыя пустыя шэрагі».
Плюс многія лядоўні выключаныя, толькі частка ў працоўным стане. Акцыі з рыбай і мясам згарнулі. Асартымент вельмі бедны. З рыбы засталася толькі замарожаная. Ды што казаць, у гіпермаркеце не змаглі купіць шарыкавыя дэзадаранты - не было ў наяўнасці.
Нагадаем, такая сітуацыя ў крамах сеткі ProStore назіраецца з сакавіка, калі ў сеткі ўзніклі праблемы з выплатай запазычанасцяў перад некаторымі пастаўшчыкамі, якія, у сваю чаргу, абмежавалі або зусім спынілі пастаўкі новых партый тавараў.
Гандлёвая сетка ProStore ўваходзіць у групу кампаній «Трайпл», кіраўніцтва якой цяпер знаходзіцца пад вартай паводле абвінавачвання ва ўхіленні ад выплаты падаткаў.