Беларускія вайскоўцы будуць вучыцца шукаць злачынцаў у лесе

Унутраныя войскі і Узброеныя Сілы правядуць супольныя вучэнні для вышуку злачынцаў у лесе.

Супольныя тактычна-спецыяльныя вучэнні для вышуку і затрымання ўзброеных злачынцаў, якія схаваліся ў лясным масіве, пройдуць 2-4 траўня ў Полацкім раёне Віцебскай вобласці. Пра гэта паведамілі БелТА ў Міністэрстве ўнутраных спраў.

У вучэннях возьмуць удзел злучэнні і вайсковыя часціны ўнутраных войскаў МУС. У якасці супрацьлеглай стараны выступяць вайскоўцы сіл спецыяльных аперацый Узброеных Сіл.

Вучэнні праводзяцца ў адпаведнасці з планам акцый арганізацыі службова-баявой дзейнасці на 2016 год. Галоўная мэта - павысіць узровень гатоўнасці сіл і сродкаў унутраных войскаў для развязання задач паводле прызначэння.

Як адзначылі ў прэс-службе ўнутраных войскаў, вучэнні будуць даволі маштабнымі, аднак не закрануць звыклы ўклад жыцця грамадзян і не перашкодзяць дзейнасці арганізацый, прадпрыемстваў ды іншых дзяржаўных структур рэгіёну.