Французскі экспэрт: Тэракт можа быць прычынай катастрофы егіпецкага А320

Магчыма, у самалёце адбылася раптоўная падзея, звязаная "з сілавым уздзеяннем".

Катастрофа пасажырскага самалёта егіпецкай авіякампаніі Egyptair, зніклага з радараў у чацвер над Міжземным морам, "практычна адназначна" была выкліканая "тэрактам", заявіў у інтэрв'ю радыёстанцыі "Эроп 1" былы кіраўнік французскай Управы ў расследаванні авіяцыйных здарэнняў (ВЕА) Жан-Поль Траадэк, паведамляе Інтэрфакс.

Паводле ягоных слоў, адсутнасць сігналу аб надзвычайным здарэнні з борта лайнера кажа пра тое, што на ім адбылася раптоўная падзея, звязаная "з сілавым уздзеяннем".

"Тэхнічная праблема, пажар або выхад з ладу рухавіка не прыводзяць да маментальнай катастрофы, у экіпажа ёсць час для рэагавання", - падкрэсліў экспэрт.

"Экіпаж нічога не паведаміў, яны нічога не распачалі, таму вельмі імаверна, што гэта было сілавое ўздзеянне, і, вядома, мы можам меркаваць тэракт", - падкрэсліў ён.

Лайнер Airbus 320 знік з радараў дыспетчараў блізу 02:30 чацвярга паводле мясцовага часу, калі ён ляцеў на крэйсерскай хуткасці на вышыні блізу 12 тысяч метраў без усякіх манеўраў. Як адзначаюць экспэрты, гэта самы бяспечны адрэзак палёту для лайнера.

Раней інтэрнэт-партал грэцкай газеты "Катимерини" паведаміў, што пасажыры аднаго грэцкага судна бачылі ў раёне выспы Карпатас, паблізу якое прапаў лайнер, агністы шар у небе. Пра агністы шар у небе паведамлялі і жыхары некалькіх грэцкіх выспаў.

На борце егіпецкага лайнера знаходзіліся 66 чалавек, з іх 56 пасажыраў. Сярод іх былі 30 грамадзян Егіпта, 15 грамадзян Францыі і прадстаўнікі яшчэ 10 дзяржаў.

Паводле апошніх звестак, самалёт мог упасці на адлегласці блізу 280 км ад узбярэжжа Егіпта. У раёне меркаванай катастрофы працуюць пошукава-выратавальныя групы.