Беларусы сталі бронзавымі прызёрамі ў эстафеце ЧС у пяціборстве

Чэмпіянат свету ў сучасным пяцібор'і стартаваў у маскоўскім спорткомплексе «Алімпійскі».

Кацярына Арол і Ірына Прасенцова сталі бронзавымі прызёрамі ў эстафеце чэмпіянату свету ў сучасным пяцібор'і, які стартаваў у маскоўскім спорткомплексе «Алімпійскі», паведамляе БелТА.

Беларускі не зусім удала выступілі ў двух відах праграмы: плаванні і канкуры (верхавой яздзе). Аднак змаглі прыкметна палепшыць свае пазіцыі пасля фехтавання і камбінаванай эстафеты (бег і стральба).

У выніку Кацярына Арол і Ірына Прасенцова набралі 1405 балаў і здабылі бронзавыя ўзнагароды. Пераможцамі ў жаночай эстафеце сталі нямецкія спартоўкі Лена Шанеборн і Аніка Шлой - 1419 балаў.

Другое месца занялі брытанкі Джаана Мюір і Саманта Мюрэй - 1409 балаў. У эстафеце ўдзельнічалі 7 камандаў.

Сёння пройдзе мужчынская эстафета турніру, у якой Беларусь прэзентуе Кірыл Касьянік і Павел Ціханаў. Спаборнікамі беларусаў будуць прадстаўнікі 16 каманд. Чэмпіянат свету ў сучасным пяцібор'і стане апошнім стартам, дзе атлеты змогуць заваяваць імянныя ліцэнзіі на Алімпійскія гульні ў Рыа-дэ-Жанейра.

Права ўдзелу ў Гульнях атрымаюць тры прызёры асабістага першынства ў мужчын і жанчын. Па завяршэнні турніру адбор на галоўныя старты чатырохгоддзя будзе праходзіць у адпаведнасці з апублікаваным на сайце Міжнароднага звязу алімпійскім рэйтынгам спартоўцаў. На яго падставе ў чэрвені 2016 года вызначацца ўладальнікі 12 пакінутых тураў (па 6 у мужчын і жанчын).

Колькасць ліцэнзій, што выдзяляюцца паводле вынікаў алімпійскага рэйтынгу, можа быць павялічана ў выпадку, калі паводле вынікаў сусветнага першынства ў лік прызёраў патрапяць спартоўцы, што раней ужо атрымалі права выступіць на Алімпійскіх гульнях у Бразіліі.