У Горадні запрашаюць на прабег цвярозасці
7- 27.05.2016, 9:55
- 15,785
Стартуе прабег 28 траўня ў апоўдні на сцежцы здароўя ў гарадскім лесапарку Пышкі.
У Горадні ўсіх ахвочых запрашаюць далучыцца да прабегу цвярозасці, паведаміў БелТА старшыня клуба аматараў бегу «Ран4фан» Аляксей Чамаданаў.
Стартуе прабег 28 траўня ў апоўдні на сцежцы здароўя ў гарадскім лесапарку Пышкі. Удзельнікам забегу трэба будзе пераадолець дыстанцыю 4,3 км. Прычым не абавязкова рабіць гэта бегам. Хто не ўпэўнены ў сваіх сілах, можа прагуляцца пехатою.
Усе хто дабярэцца да фінішу атрымаюць спецыяльныя прызы.
«Галоўная мэта прабегу - прыцягнуць як мага больш гараджан да здаровага ладу жыцця, паказаць, што выходныя можна праводзіць з карысцю. Не ляжаць на канапе, не хадзіць па барах, а ў прыемнай кампаніі на свежым паветры весела бавіць час», - адзначыў Аляксей Чамаданаў.
Гарадзенскі клуб аматараў бегу «Ран4фан» стаў партнёрам мерапрыемства, якое арганізуе Гарадзенскае дабрачыннае таварыства.
Прабегі цвярозасці ў Горадні праводзяцца некалькі гадоў. Каля двух гадоў таму іх сталі праводзіць некалькі разоў на год: летам і 1 студзеня.
Колькасць удзельнікаў увесь час расце. «Разлічвалі, што 1 студзеня прыйдзе чалавек 50-70, а ўдзел у забегу прынялі больш за 140 аматараў здаровага ладу жыцця. Спадзяемся, што заўтра гэты рэкорд будзе пабіты», - адзначыў Аляксей Чамаданаў.
Сёлета праграму забегу цвярозасці разбавілі цікавымі спаборніцтвамі. Пройдуць міні-турніры ў адцісканні ад падлогі і на брусах, падцягванню на перакладзіне і ўздыму гіры. Майстар-класы правядуць каманды чырлідзінга, спецыялісты з фітнес-цэнтра, клуб славянскіх адзінаборстваў.