Дональд Трамп адмовіўся ад дэбатаў з Бэрні Сандэрсам

Мільярдэр мяркуе, што апанентам будзе Хілары Клінтан.

Найбольш імаверны кандыдат у прэзідэнты ЗША ад Рэспубліканскай партыі, мільярдэр Дональд Трамп адмовіўся ўдзельнічаць у тэледэбатах з сенатарам Бэрні Сандэрсам, які саступіць у гонцы сярод дэмакратаў былой дзяржсакратарцы Хілары Клінтан.

Сваё рашэнне Трамп патлумачыў тым, што яму, як самаму імавернаму кандыдату ад рэспубліканцаў, здаецца немэтазгодным праводзіць дэбаты з тым, хто хутчэй за ўсё зойме другое месца паводле вынікаў праймерыз Дэмакратычнай партыі, паведамляе BBC.

«Я буду чакаць магчымасці правесці дэбаты з пераможцай дэмакратычных праймерыз», - заявіў Трамп.

Раней Трамп заяўляў, што гатовы паўдзельнічаць у дэбатах з Сандэрсам пры ўмове, што выбарчы штаб дэмакрата ахвяруе яму як мінімум 10 млн даляраў на дабрачыннасць.

Бэрні Сандэрс выказаў расчараванне ў сувязі з адмовай Трампа ўдзельнічаць у дэбатах і выказаў надзею, што Дональд Трамп яшчэ памяняе сваё меркаванне.

Раней ад удзеле ў тэледэбатах з Бэрні Сандэрсам адмовілася яго апанентка ў дэмакратычнай гонцы за пасаду прэзідэнта ЗША Хілары Клінтан. Як растлумачыў прадстаўнік яе штаба, Хілары Клінтан мае намер выдаткаваць больш часу на сустрэчы з выбарцамі ў розных раёнах Каліфорніі.

На мінулым тыдні Хілары Клінтан заявіла, што яе спаборніцтва з Берні Сандэрсам скончана і што менавіта яна стане кандыдатам у прэзідэнты ЗША ад Дэмакратычнай партыі. Сандэрс у сваю чаргу заявіў, што не выйдзе з прэзідэнцкай гонкі і мае намер змагацца.

Дэмакратам засталося правесці праймерыз яшчэ ў дзевяці штатах, але вызначальным стане галасаванне 7 чэрвеня ў Каліфорніі, самым густанаселеным штаце ЗША.