Два літоўскія топ-мэнэджары сышлі з ProStore Чыжа

Літоўскія топ-мэнэджары сеткі гіпермаркетаў ProStore Валдас Пузерас і Алвідас Шусцікас на днях пакінулі рытэйлера.

Пра гэта tut.by паведамілі інфармаваныя крыніцы.

Пузерас прапрацаваў кіраўніком сеткі ProStore, якая аб'ядноўвае 5 гіпермаркетаў у Менску, тры гады. Шусцікас - каля года. «Шусцікас быў прыцягнутым кансультантам», - кажа знаёмы абодвух топ-мэнэджараў. Як вынікае з сеткі Linkedin, Шусцікас кансультаваў рытэйлераў у Беларусі і Азербайджане, дзе ён 4 гады кіраваў раздробнай сеткай Fresco. З 21-га траўня ён узначаліў кампанію Maxima grupė, кіравальную сеткамі раздробнага гандлю ў краінах Балтыі, Польшчы і Балгарыі.

Як паведамілі крыніцы, літоўцы сыход з кампаніі патлумачылі тым, што цяпер, калі «пачаўся працэс аднаўлення нармальнай гандлёвай дзейнасці сеткі», іх «нагрузка істотна паменшылася, а выдаткі на знаходжанне занадта вялікія ў параўнанні з карысцю, якую маглі б прынесці ў існай сітуацыі». «Узровень мясцовых спецыялістаў дастатковы, каб справіцца з цяперашнімі выклікамі», - мяркуе Пузерас, словы якога перадаюць нашы суразмоўцы.

Часова выконваючай абавязкі намесніцы дырэктара ў гандлі кампаніі «Прастор Трэйд» стала Наталля Несцяровіч. Пра яе вядома тое, што адкрывала ў 2013 годзе самую вялікую краму ўжо ліквідаванай сеткі «Родная старонка».

Дырэктарам «Прасторы Трэйд» з'яўляецца Сяргей Чыж, сын кіраўніка групы кампаній «Трайпл» Юрыя Чыжа, які з сакавіка знаходзіцца ў следчыі ізалятары КДБ.

12 траўня Галоўная ўправа спажывецкага рынку (ГУПР) Менгарвыканкама стварыла працоўную групу ў маніторынгу дзейнасці сеткі гіпермаркетаў ProStore. У яе склад увайшлі прадстаўнікі ГУПР, «Беларусбанка», Міністэрства падаткаў і збораў, Мінгандлю і кампаніі «Прастор-Трэйд».