Польшча адмовіцца ад доўгатэрміновых кантрактаў з Газпрамам
2- 31.05.2016, 10:07
- 9,286
Польшча плануе знізіць залежнасць ад расейскага газу.
Дзяржаўная газавая кампанія Польшчы PGNiG не мае намеру пралангіраваць доўгатэрміновы кантракт з Газпрамам на пастаўку расейскага газу. Пра гэта заявіў упаўнаважаны ўрада Польшчы ў пытаннях газавай і энэргетычнай інфраструктуры Пётр Наімскі, паведамляе ria.ru.
«Мы будзем імкнуцца да сітуацыі, пры якой доўгатэрміновы кантракт сыдзе ў мінулае. Калі кошт расейскага газу будзе дастаткова канкурэнтаздольным, мы не выключаем магчымасці яго набыцця, але дакладна не ў рамках доўгатэрміновага пагаднення», - сказаў ён.
Тэрмін дзеяння кантракту, падпісанага ў 1996 годзе, мінае 2022 годзе. Паводле дамовы, Польшча набывае да 10,2 мільярда кубаметраў расейскага газу ў год. Асноўны аб'ём спажывання краіны складае амаль 15 мільярдаў кубаметраў.
Каб знізіць сваю залежнасць ад расейскага газу, Польшча пабудавала тэрмінал звадкаванага прыроднага газу і мае намер пабудаваць газаправод у Паўночнае мора. Будаўніцтва газаправода дазволіць Польшчы праз Данію і Балтыйскае мора атрымліваць рэсурс з Нарвегіі.
Раней паведамлялася, што пяць еўрапейскіх партнёраў у судовым парадку патрабуюць ад Газпрама перагледзець кошты на пастаўкі расейскага газу.