Стогадовы рубеж пераадолелі 484 жыхары Беларусі

Мужчын у гэтай шаноўнай узроставай катэгорыі ў 7 разоў менш, чым жанчын.

Стогадовы рубеж пераадолелі 484 жыхары Беларусі, паведаміла БелТА прэс-сакратарка Міністэрства працы і сацыяльнай абароны Таццяна Максімава. Сярод айчынных доўгажыхароў прадстаўніцы прыгожага полу лідзіруюць: адзначылі свой 100-гадовы юбілей 426 жанчын і 58 мужчын.

Як і ў папярэднія гады, прадстаўнікоў моцнага полу ў гэтай шаноўнай узроставай катэгорыі ў 7 разоў менш, чым іх аднагодак.

Са слоў суразмоўніцы, на 1 красавіка гэтага года ў рэспубліцы налічвалася сем беларусаў ва ўзросце 110 гадоў і старэй, з іх два чалавекі, якія пражываюць у Гарадзенскай і Менскай абласцях, нарадзіліся на світанку мінулага стагоддзя, - цяпер яны ва ўзроставай катэгорыі 115 гадоў і старэй.

Сярод рэгіёнаў краіны лідарам па колькасці доўгажыхароў традыцыйна з'яўляецца Гарадзенская вобласць: тут на 1 красавіка гэтага года быў 101 чалавек ва ўзросце больш за 100 гадоў.

На другой пазіцыі геранталагічнага рэйтынгу - Менская вобласць (79), на трэцяй - Віцебская (71). У Берасцейскай вобласці пражываюць 66 чалавек, якія ўжо адзначылі свой векавы юбілей, у Гомельскай - 65, у горадзе Менску - 55, у Магілёўскай вобласці - 47. Паводле звестак на 1 студзеня гэтага года ў Беларусі налічваўся 531 доўгажыхар ва ўзросце 100 гадоў і старэй.