Бабруйск у 2017 годзе стане «культурнай сталіцай» Беларусі

Такая пастанова прынятая сёння на калегіі Міністэрства культуры.

Прадстаўляючы прэзентацыю горада, намінаванага на статус «Культурнай сталіцы года», намеснік старшыні Бабруйскага гарвыканкама Аляксандр Маркачоў адзначыў, што Бабруйск упершыню ўдзельнічаў у конкурсным адборы ў 2012 годзе, паведамляе БелТА.

За мінулыя пяць гадоў горад правёў вялікую працу ва ўмацаванні і развіцці базы ўстаноў культуры. З агульнага бюджэтнага фінансавання на гэта было накіравана больш за 30 млрд рублёў.

Сёння ў Бабруйску ганарацца карцінай галерэяй, адкрытай у 2012 годзе. У яе калекцыі не толькі працы бабруйскіх мастакоў і керамістаў, але і творы ўдзельнікаў плэнэру Art-Жыжаль з 18 краін, дзякуючы якому калекцыя папоўнілася больш чым на 600 адзінак.

Як адзначыў Аляксандр Маркачоў, праведзены капітальны рамонт дзіцячай школы мастацтваў №2 імя У.У.Алоўнікава. Гэта дазволіла арганізаваць у Год культуры першы адкрыты конкурс юных піяністаў імя Алоўнікава. Ён сабраў прадстаўнікоў моладзі з усіх куткоў краіны. У Бабруйску нацэленыя працаваць, каб конкурс атрымаў рэспубліканскі статус.

Акрамя таго, у гэтым годзе да Дня горада будзе адкрыты помнік пісьменніку, кінарэжысёру бабруйчаніну Эфраіму Севелу. Будзе таксама ўстаноўлены памятны знак воінам-авіятарам.

У 2017 годзе плануецца адкрыць Моладзевы парк, ініцыятарам закладкі якога стала моладзь горада. У вялікі сацыяльна-творчы праект штогод выліваецца канцэрт «Дарагому гораду прысвячаецца», які праходзіць у выніку работы народна-гаспадарчага комплексу горада. Сярод устаноў адукацыі абвешчаны конкурс у зборы матэрыялаў для выдання буклетаў «Нашы вядомыя землякі». Вынікі конкурсу будуць падведзеныя ў 2017 годзе, калі горад адзначыць сваё 630-годдзе.

Вядуцца перамовы з дачкой заслужанага мастака Расейскай Федэрацыі Абрама Рабкіна аб перадачы творчай спадчыны мастака-патрыёта, які апеў сваю малую Радзіму. Яна можа стаць упрыгожваннем мастацкага музея і гонарам Бабруйска.

Візітнай карткай горада стаў міжнародны фестываль «Вянок дружбы», які аб'яднаў пад дэвізам дружбы за 13-гадовую гісторыю 38 краін пяці кантынентаў. Упершыню за апошнія пяць гадоў удзельнікамі фестывалю сталі калектывы з Аўстрыі, Францыі, Бельгіі, Швэцыі, Нідэрландаў, Гішпаніі, Кіпра, ЗША, Кубы, Мексікі, Калумбіі, Ганы, Індыі, Чарнагорыі, Босніі і Герцагавіны, Ізраіля.

Ганаровы статус культурнай сталіцы года дасць магчымасць маштабна раскрыць патэнцыял горада, прыцягнуць увагу да яго гістарычнай спадчыны як беларусаў, так і замежных гасцей.

Як адзначыў міністр культуры Барыс Святлоў, важна таксама акрамя культурных мерапрыемстваў спланаваць мерапрыемствы ў іншых сферах жыцця. Бо абвешчаны ў Беларусі Год культуры мае на ўвазе прэзентацыю культуры ў шырокім сэнсе гэтага слова, а значыць, трэба максімальна аб'ёмна паказаць і іншыя сферы дзейнасці. Ён таксама прапанаваў апрабаваць у Бабруйску ідэю прысуджэння статусу «Ганаровы грамадзянін культурнай сталіцы Беларусі».

Праект «Культурная сталіца Беларусі» стартаваў у 2010 годзе. Першым гэтага статусу быў ганараваны Полацк. Затым эстафету падхапілі Гомель, Нясвіж, Магілёў, Горадня, Берасце. У гэтым годзе Маладзечна носіць статус культурнай сталіцы Беларусі.