Лукашэнка - кіраўніку Следчага камітэта: Вы падпарадкоўваецеся толькі мне

Дыктатар занепакоіўся, што на старшыню Следчага камітэта можа «хтосьці ўплываць».

Аляксандру Лукашэнку «час ад часу паступае інфармацыя пра спробы ўплыву на Следчы камітэт у сувязі з прыходам на пасаду кіраўніка новага чалавека», гаворыцца ў паведамленні прэс-службы Лукашэнкі 4 траўня ў выніку дакладу старшыні Следчага камітэта Івана Наскевіча.

Наскевіч быў прызначаны старшынём СК 10 лістапада мінулага года.

Лукашэнка нагадаў, што Следчы камітэт і яго старшыня падпарадкаваныя толькі яму асабіста. Са словаў дыктатара, яму час ад часу паступае інфармацыя пра спробы ўплыву на Следчы камітэт у сувязі з прыходам на пасаду кіраўніка новага чалавека. У сувязі з гэтым Лукашэнка падкрэсліў, што ніякага ўздзеяння на Следчы камітэт быць не можа.

Наскевіч праінфармаваў Лукашэнку аб тым, што практычна скончаная аптымізацыя арганізацыйна-штатнай структуры камітэта. Яе зазналі, прынамсі, фінансавыя і тылавыя падраздзяленні.

Акрамя таго, у Следчым камітэце прадаўжаецца скарачэнне шэрагу пасад. Лукашэнка заклікаў захаваць у шэрагах камітэта найлепшых работнікаў. Пад скарачэнне, на думку дыктатара, могуць трапляць тыя, хто, напрыклад, не жадае працягваць службу. «Менавіта такім шляхам пайшлі ў СК. Сёння тут няма ніводнай скаргі ў сувязі з аптымізацыяй штатаў», - інфармуе прэс-служба Лукашэнкі.

Лукашэнку было таксама даложана аб змене крытэрыяў ацэнкі эфектыўнасці следчай працы, пра стан службовай дысцыпліны ў Следчым камітэце, ходзе расследавання рэзанансных крымінальных спраў, якія знаходзяцца на кантролі дыктатара.

Акрамя таго, Лукашэнка быў праінфармаваны аб развіцці міжведамаснага супрацоўніцтва, прынамсі, са Следчым камітэтам Расеі. Дыктатар выказаўся за тое, каб «беларускія і расейскія следчыя супольна выбудоўвалі выразную лінію барацьбы са злачыннасцю, паколькі гэта дасць магчымасць павысіць эфектыўнасць расследавання злачынстваў на тэрыторыі абедзвюх краін».