Праваабаронцы заклікалі сусветных поп-зорак адмовіцца ад канцэртаў у Баку

Міжнародныя праваабарончыя арганізацыі аб'ядналіся ў кааліцыю "Спорт за правы", каб супрацьстаяць рэпрэсіям у Азербайджане.

Міжнародныя праваабарончыя арганізацыі, якія аб'ядналіся ў кааліцыю "Спорт за правы", каб супрацьстаяць рэпрэсіям у Азербайджане, звярнуліся да поп-зорак Крыса Браўна, Энрыке Іглесіяса і Фарэлу Уільямса, абвешчаных хэдлайнерамі канцэртнай праграмы падчас Гран-пры Еўропы Формулы-1, з заклікам адмовіцца ад сваіх выступаў і асудзіць брутальныя парушэнні правоў чалавека ў краіне, піша ПЦ "Вясна". Падаем тэкст звароту:

- Мы звяртаемся да вас ад імя кампаніі “Спорт за правы”, якая намагаецца агучыць факты парушэння правоў чалавека ў Азербайджане напярэдадні Гран-пры Еўропы Формулы-1. Мы глыбока расчараваныя вашай пастановай выступіць 18 чэрвеня на Гран-пры Еўропы ў Баку, улічваючы змрочнае становішча ў галіне правоў чалавека ў краіне. Мы заклікаем Вас заняць актыўную пазіцыю ў дачыненні да правоў чалавека ў Азербайджане і скасаваць выступы ў Баку.

Мы адзначаем Вашу падтрымку на дабрачынныя мэты, у тым ліку ў межах кампаніі Save the Children, якая выступае за заахвочванне і абарону правоў чалавека. На жаль, правы азербайджанскіх грамадзянаў не выконваюцца і не абараняюцца. Хоць 16 палітычных зняволеных і былі нядаўна вызваленыя, дзясяткі дагэтуль пакутуюць ў азербайджанскіх турмах, у тым ліку журналісты, блогеры, моладзевыя актывісты, палітыкі і рэлігійныя дзеячы, віна якіх толькі ў тым, што яны былі нязгодныя з уладамі. Нягледзячы на тое, што яны наогул не мусілі апынуцца за кратамі, вызваленыя зняволеныя не былі рэабілітаваныя; на іх дагэтуль накладзеныя прававыя абмежаванні, якія перашкаджаюць іх працы і жыццю, а некаторым з іх забаронена пакідаць межы краіны дзеля атрымання тэрмінова неабходнай медыцынскай дапамогі. У больш шырокім сэнсе, грамадзянская супольнасць спрабуе працаваць у амаль немагчымых умовах, а шэраг НДА сталі ахвярамі палітычна матываваных крымінальных спраў.

Журналісты працуюць у атмасферы страху, дзяржава дамінуе ў медыя-асяроддзі, дзе жорсткія напады – нават забойстваы – супраць крытыкаў рэжыму ўчыняюцца беспакарана.

Як і ў выпадку з папярэднімі прэстыжнымі падзеямі, азербайджанскія ўлады выкарыстоўваюць Гран-пры Еўропы як спробу абяліць свой імідж, каб адцягнуць увагу міжнароднай супольнасці ад парушэнняў правоў чалавека, якія адбываюцца ў краіне. Насуперак Вашаму жаданню Вашыя выступы будуць выкарыстаныя як частка гэтага маскавання і, як прапаганда ў руках ўсё больш аўтарытарнага ўрада. Выступ у Азербайджане паслужыць далейшаму паглыбленню пакут палітычных зняволеных у краіне, а таксама многіх іншых, чые правы былі парушаныя гэтым самым урадам, які атрымае ад Гран-пры Еўропы патрэбныя дывідэнды.

Але ў вас яшчэ ёсць шанец усё выправіць. Мы заклікаем Вас скасаваць выступы ў Баку, і выступіць публічна, асудзіўшы ўжыванне жорсткіх захадаў у галіне правоў чалавека ў Азербайджане, а таксама заклікаць да неадкладнага і безумоўнага вызвалення палітычных зняволеных. Звяртаем Вашу ўвагу на каментары, зробленыя вакалістам гурта U2 Бона на сцэне ў Манрэалі ў чэрвені мінулага года, у ноч цырымоніі адкрыцця Еўрапейскіх гульняў у Баку. Бона назваў імёны шасці палітычных зняволеных у Азербайджане, паказаўшы іх фатаздымкі на арэне, і перадаў пасланне прэзідэнту Аліеву: “Калі што-небудзь здарыцца з адным з нашых сяброў, мы прымусім Вас адказаць за гэта”. Пяцёра зняволеных, імёны якіх ён назваў, былі вызваленыя. Мы мяркуем, што Ваша цвёрдая пазіцыя аб правах чалавека таксама можа значна паўплываць.