Нацбанк заклікае спыніць «хранічна» неэфектыўныя прадпрыемствы

Банкі далі крэдыты праблемным прадпрыемствам, праз крызіс яны не могуць вярнуць пазыкі.

Пра гэта было заяўлена 5 траўня на пашыраным пасяджэнні ўправы Нацыянальнага банка.

Як паведамляе прэс-служба галоўнага банка краіны, на пасяджэнні, дзе разглядаліся вынікі рэалізацыі грашова-крэдытнай палітыкі ў першым квартале 2016 года, было адзначана, што дзель праблемных актываў банкаўскага сектара на 1 красавіка дасягнула 11,5%, што негатыўна цісне на фінансавы вынік і капітал банкаў.

Праблема крэдытнай рызыкі развязваецца падчас супольных абмеркаванняў з удзелам Нацбанка, урада, камерцыйных банкаў і найбуйнейшых крэдытаатрымальнікаў. Большасці прадпрыемстваў, якія сутыкнуліся з праблемай пагаршэння фінансавага стану, банкі дапамаглі ў рэфінансаванні запазычанасці і пераразмеркаванні пазыковай нагрузкі зыходзячы з плыняў прыбытку, што паступае.

Разам з тым, як адзначаюць у Нацбанку, абмежаваць крэдытныя рызыкі толькі за кошт банкаўскага сектара не магчыма.

«Для недапушчэння пагаршэння паказчыкаў дзейнасці банкаў трэба ўрэгуляваць праблему неабслужаных крэдытаў, забяспечыць актыўнае выкарыстанне механізму санацыі жыццяздольных структур і выводзіць з рынку «хранічна» неэфектыўныя прадпрыемствы»,- заяўляе галоўны банк краіны.

Найважнейшай задачай, на думку Нацбанка, цяпер з'яўляецца актывізацыя работы для дэдалярызацыі эканомікі. У сувязі з гэтым Нацбанк выступіў з ініцыятывай распрацаваць супольны з урадам план мерапрыемстваў, які прадугледжвае ўсебаковыя захады для дэдалярызацыі эканомікі і выразны графік іх рэалізацыі.

Як было адзначана падчас пасяджэння, на фоне неспрыяльнай замежнаэканамічнай сітуацыі ў першым квартале 2016 года Нацбанкам і банкамі агулам дасягнутыя пастаўленыя на гэты перыяд задачы. Запаволенне тэмпаў росту грашовай масы, фармаванне чыстай прапановы замежнай валюты на ўнутраным валютным рынку, нармалізацыя сітуацыі на дэпазітным рынку абумоўліваюць памяншэнне інфляцыйнага ціску ў краіне. Гэта стварае магчымасці для паступальнага зніжэння рэальных адсоткавых ставак у эканоміцы, улічваючы іх дастаткова высокі сённяшні ўзровень.

«Адпаведна, адной з задач для банкаўскай сістэмы найбліжэйшым часам застанецца «нармалізацыя» прэміі ды рызыкі, што закладзеная ў адсоткавых стаўках як для дэпазітаў, так і для крэдытаў. Яе развязанне будзе праводзіцца паступова, з улікам комплекснага аналізу існых макраэканамічных рызык і прагнозу развіцця эканомікі краіны», - заяўляюць у Нацбанку.

Адначасова будзе працягнутая рэгуляванне грашовай прапановы. Цяпер гэта «аб'ектыўна неабходна» для захавання макраэканамічнай збалансаванасці і забеспячэння фінансавай стабільнасці.

Агулам, паводле звестак Нацбанка, большасць індыкатараў фінансавай стабільнасці знаходзяцца ў бяспечных дыяпазонах, гарантуецца ўстойлівае бесперабойнае функцыянаванне фінансавага сектара.

За першы квартал 2016 года тэрміновыя дэпазіты насельніцтва ў беларускіх рублях знізіліся на 1,4 трлн рублёў, у замежнай валюце - на 153 млн даляраў ЗША.

Такая сітуацыя, на думку Нацбанка, «шмат у чым тлумачыцца імкненнем хатніх гаспадарак захаваць выдаткі на канчатковае спажыванне ва ўмовах зніжэння рэальных грашовых даходаў за кошт выкарыстання гатовых ашчаджэнняў». Сярод іншых чыннікаў, якія ўздзейнічаюць на паводзіны насельніцтва, галоўны банк краіны таксама адзначае студзеньскі ўсплёск дэвальвацыйных чаканняў і змененыя ўмовы функцыянавання дэпазітнага рынку.

У той жа час, як паказвае Нацбанк, ступень іх уплыву паступова зніжаецца, пра што сведчыць адноўленая дынаміка аб'ёмаў зноў укладзеных дамоў. Калі ў студзені 2016 года, калі назіралася мінімальнае значэнне, аб'ём зноў прыцягнутых укладаў склаў 2,4 трлн рублёў, то ў сакавіку ён вырас да 3,6 трлн рублёў.