Лукашэнка: Рабочыя спецыяльнасці - гэта аснова ўсяго

Дыктатар запатрабаваў прыбраць з прафтэхадукацыі ўсё лішняе і шчыльней звязаць яе з вытворчасцю.

Пра гэта Лукашэнка заявіў, наведваючы Мінскі маторны завод, паведамляе БелТА.

«Рабочыя спецыяльнасці - гэта аснова ўсяго, таму мною пастаўленая задача аптымізаваць прафтэхадукацыю, прыбраць усё лішняе ў гэтай сістэме навучання. Пры гэтым патрэбная больш шчыльная, эфектыўная сувязь з вытворчасцю», - заявіў правадыр.

Рабочыя Мінскага маторнага завода пацікавіліся ў прэзідэнта, што трэба, каб падвысіць статус рабочых спецыяльнасцяў. У сувязі з гэтым Лукашэнка адзначыў: «Каб павысіць статус кожнай прафесіі, трэба стварыць годнае працоўнае месца для чалавека і плаціць яму тое, што ён зарабляе».

На думку Лукашэнкі, вельмі важна для будучага спецыяліста практычна штодня бываць на вытворчасці і набываць першыя навыкі сваёй спецыяльнасці яшчэ падчас вучобы.

Нагадаем, што раней Лукашэнка заявіў аб тым, што вышэйшая адукацыя не павінна быць даступнай для ўсіх.