Нямеччына і Францыя адзіныя ў стаўленні да выхаду Брытаніі з ЕЗ

Ангела Мэркель і Франсуа Аланд сёння правядуць перамовы ў Бэрліне.

Канцлерка Нямеччыны Ангела Мэркель і прэзідэнт Францыі Франсуа Аланд заявілі, што прыйшлі да поўнага згоды ў пытанні аб тым, як дзейнічаць у сувязі з перамогай на рэферэндуме ў Брытаніі прыхільнікаў выхаду краіны з Еўразвязу, паведамляе расейская служба BBC.

Прэзідэнт Аланд заявіў, што без адзінства «паўстане рызыка расколу, рознагалоссяў і спрэчак».

Мэркель і Аланд сёння правядуць перамовы ў Бэрліне - на фоне бурнай актыўнасці дыпламатаў усіх краін ЕЗ у сувязі з «брэксітам».

У панядзелак раніцай курс фунта зноў упаў пасля адкрыцця азіяцкіх рынкаў.

Міністр фінансаў Вялікабрытаніі Джордж Осбарн паспрабаваў супакоіць рынкі.

«Брытанія гатовая з пазіцыі сілы супрацьстаяць таму, што нам рыхтуе будучыня», - заявіў ён у панядзелак у сваім выступе. «Я не хачу, каб Брытанія паварочвалася спінай да Еўропы ці астатняга свету», - дадаў міністр.

Осбарн адзначыў, што краіну чакае «нялёгкі шлях», але Брытанія, з яго слоў, «гатовая да ўсяго».

Міністр прызнаў, што некаторыя кампаніі ў сувязі з галасаваннем за «брэксіт» прыпынілі свае інвестыцыі, а таксама прыняцце рашэнняў па найму персаналу. З яго слоў, эканоміцы краіны непазбежна давядзецца прыстасоўвацца да новай рэальнасці.

«Неймаверная стала незваротным»

Выступаючы ў нядзелю, прэзідэнт Аланд сказаў, што скасаваць пастанову брытанскіх выбаршчыкаў немагчыма. «Тое, што раней было неймаверна, стала незваротным», - сказаў ён.

У панядзелак канцлерка Мэркель сустрэнецца ў Бэрліне з прэзідэнтам Аландам, прэм'ер-міністрам Італіі Матэа Рэнца і кіраўніком Еўрапейскай Рады Дональдам Тускам.

Дзяржсакратар ЗША Джон Кэры таксама прыбывае ў Брусэль на перамовы.

Выступаючы ў суботу ў Рыме, Кэры выказаў шкадаванне ў сувязі з пастановай брытанскіх выбарцаў, але дадаў, што ЗША маюць намер і далей падтрымліваць цесныя стасункі з ЕЗ.

«Брэксіт» і змены, якія цяпер у гэтай сувязі абмяркоўваюцца, павінны разглядацца ў кантэксце інтарэсаў і каштоўнасцяў, якія звязваюць нас з ЕЗ», - сказаў дзяржсакратар ЗША.

Прэзідэнт ЗША Барак Абама падкрэсліў, што асаблівыя стасункі паміж ЗША і Брытаніяй захаваюцца, нягледзячы на вынік рэферэндуму.

Як мага хутчэй

У мінулыя выходныя старшыня Еўракамісіі Жан-Клод Юнкер сказаў, што працэс выхаду Брытаніі з ЕЗ павінен пачацца неадкладна.

Многія еўрапейскія лідары таксама заклікаюць Лондан пачаць перамовы як мага хутчэй.

Аднак міністр замежных спраў Вялікабрытаніі Філіп Хэманд сказаў, што «на гэты момант нічога не адбудзецца».

Гэты пункт гледжання падтрымлівае кіраўнік канцылярыі Мэркель Пэтэр Альтмаер, са слоў якога, брытанскім палітычным дзеячам неабходны час, каб асэнсаваць наступствы выхаду са складу Еўразвязу.

Дэвід Кэмеран заявіў, што сыдзе з пасады прэм'ер-міністра да кастрычніка, і што перамовы з ЕЗ будзе весці яго пераемнік, які можа фармальна запусціць дзеянне 50-га артыкула Лісабонскай дамовы, які апісвае працэдуру выхаду з Еўразвязу. Згодна з гэтым артыкулам, на перамовы сыдзе да двух гадоў.

Вынік рэферэндуму шакаваў ЕЗ, а таксама выявіў глыбокі раскол у брытанскім грамадстве.

52% адсоткі прагаласаваўшых выказаліся «за» «брэксіт», аднак у Шатландыі 62% выбарцаў заявілі, што хочуць застацца ў ЕЗ.

Першая міністрка Шатландыі Нікола Стэрджэн сказала ў інтэрв'ю, што шатландскі парламент можа паспрабаваць заблакаваць «брэксіт».

Яна таксама пацвердзіла, што цяпер урад Шатландыі абмяркоўвае магчымасць правядзення паўторнага рэферэндуму аб пытанні незалежнасці Шатландыі.