Эрдаган: Мяне не цікавіць тое, што кажуць еўрапейскія лідары

Турэцкі кіраўнік паабяцаў, што распачатыя ў краіне чысткі працягнуцца да поўнага «выкаранення віруса».

Прэзідэнт Турцыі даў эксклюзіўнай інтэрв'ю тэлеканалу France 24 - першае пасля спробы дзяржаўнага перавароту 15 ліпеня (пераклад - RFI).

У размове з журналістамі Рэджэп Таіп Эрдаган пракаментаваў путч, які адбыўся ў краіне, і адказаў на крытыку з боку ЕЗ.

У інтэрв'ю France 24 Эрдаган чарговым разам назваў завадатарам путчу свайго былога паплечніка Фетхуллаха Гюлена, ісламскага прапаведніка і апазіцыянера, які пражывае ў ЗША.

«Мы ведаем, хто стаіць за спробай дзяржаўнага перавароту. Путч адбыўся на ўказ з Пенсільваніі», - заявіў турэцкі лідар. З яго слоў, частка з удзельнікаў путчу, ужо прызналіся, што атрымалі ўказанні ад Гюлена.

«Адзін з тых, хто ўзяў у закладнікі кіраўніка генштаба, прапанаваў яму пагаварыць праз тэлефон з лідарам путчыстаў Фетхуллахам Гюленам. France 24 - першае СМІ, дзе я пра гэта кажу», - адзначыў ён.

Эрдаган таксама адказаў лідарам ЕЗ, што раскрытыкавалі ўвядзенне надзвычайнага становішча ў краіне. «Мяне не цікавіць тое, што кажуць еўрапейскія лідары, і я да іх не прыслухоўваюся», - сказаў прэзідэнт.

Турэцкі лідар паабяцаў, што пачатыя ў краіне чысткі працягнуцца да поўнага «выкаранення віруса».

Пасля няўдалай спробы путчу 15 ліпеня Эрдаган увёў у краіне рэжым надзвычайнага здарэння. Гэтая мера дазваляе між іншым уводзіць каменданцкую гадзіну, праводзіць ператрусы без ордэра, падаўжаць тэрміны зняволення пад варту, абмяжоўваць свабоду сходаў, а таксама свабоду перамяшчэння ўнутры краіны.

Міжнародная праваабарончая арганізацыя Amnesty International паведаміла ў нядзелю, 24 ліпеня, што мае довады катаванняў арыштаваных путчыстаў.

«Amnesty International валодае дакладнай інфармацыяй, згодна з якой турэцкая паліцыя ў Анкары і Стамбуле ўтрымлівае зняволеных у пакутлівых позах, часам цягам 48 гадзін», - гаворыцца ў камюніке арганізацыі.

«Неабходна, каб турэцкія ўлады неадкладна спынілі гэтыя жахлівыя дзеянні», - заявіў кіраўнік еўрапейскага аддзялення Amnesty International Джон Далхайзен.

Паводле апошніх звестак, у выніку путчу 15 ліпеня ў Турцыі загінулі 270 чалавек. Больш за 5800 чалавек былі арыштаваныя і змешчаныя пад варту, у тым ліку 3718 вайскоўцаў і 123 генералы турэцкага войска.