Новы калінінградскі губернатар выдаткаваў 49 секунд на камунікацыю з журналістамі
15- 31.07.2016, 11:56
- 13,775
Былы ахоўнік Пуціна параіў журналістам «працаваць над дабрабытам насельніцтва».
Выконваючы абавязкі губернатара Калінінградскай вобласці Яўген Зінічаў на сваім першым афіцыйным мерапрыемстве выдаткаваў на камунікацыю з журналістамі 49 секунд, паведамляе meduza.io.
30 ліпеня Зінічаў быў афіцыйна прадстаўлены ў новай якасці ва ўрадзе вобласці. Начальніца ўпраўлення ўнутранай палітыкі адміністрацыі прэзідэнта РФ Таццяна Воранава паведаміла на цырымоніі, што ўказ Уладзіміра Пуціна аб прызначэнні Зінічава ўвайшоў у дзеянне 28 ліпеня, пасля чаго перадала слова новаму кіраўніку рэгіёну.
Зінічаў у сваім выступе заявіў, што «бяспека нашых рубяжоў з'яўляецца абавязковай умовай суверэнітэту Расейскай Федэрацыі», і заклікаў «працаваць над сацыяльнай сферай, у першую чаргу над дабрабытам насельніцтва».
Затым Зінічаў выйшаў да журналістаў і за 49 секунд адказаў на два пытанні. Спачатку ён паведаміў, што лічыць прыярытэтам сваёй працы прыцягненне інвестыцый у Калінінградскую вобласць. «Усё, што тычыцца канкрэтыкі, я думаю, што мы яшчэ сустрэнемся, пагаворым. Я павінен пагрузіцца ў тэму», - сказаў кіраўнік рэгіёну.
Другое пытанне было зададзена з нагоды рашэння Зінічава прызначыць выканаўцам абавязку старшыні ўрада вобласці 29-гадовага Антона Аліханава. Выданне «Новый Калининград» адзначае, што гэтая пастанова перакуліла сістэму кіравання вобласцю, бо дагэтуль урадам рэгіёну кіраваў сам губернатар. «У Антона Андрэевіча ёсць добры досвед, і ён сапраўды добры спецыяліст», - пракаментаваў Зінічаў прызначэнне Аліханава.
Яўген Зінічаў да свайго прызначэння на пасаду выканаўца абавязку губернатара Калінінградскай вобласці узначальваў рэгіянальнае ўпраўленне ФСБ. З 1987 да 2015 года, як паказана на сайце ўрада вобласці, ён «служыў на розных пасадах у органах дзяржаўнай бяспекі».
Прэс-сакратар прэзідэнта РФ Дзмітрый Пяскоў паведаміў, што Зінічаў працаваў у службе бяспекі кіраўніка дзяржавы. Пяскоў пацвердзіў, што на рашэнне Пуціна паўплываў досвед працы Зінічава ў спецслужбах.
