Facebook памяняў механізм адлюстравання папулярных навін

Апошнія змены павінны пашырыць разнастайнасць навін, якія абмяркоўваюцца.

Сацыяльная сетка Facebook абвясціла аб аўтаматызацыі механізму трэндзінга, з дапамогай якога адбіраюцца найбольш папулярныя ў сетцы навіны, каб знізіць ступень чалавечага ўмяшання ў працэс і пазбегнуць абвінавачванняў у прадузятасці.

Акрамя таго, Facebook адмаўляецца ад апісанняў папулярных запісаў, якія складаюцца яе рэдактарамі, цытуе паведамленне кампаніі Інтэрфакс.

Прычынай істотных зменаў стаў скандал, які разгарэўся вясной сёлета. Тады партал Gizmodo выявіў, што супрацоўнікі Trending Topics - падраздзялення Facebook, адсочвалі найбольш папулярныя тэмы, - рэгулярна замоўчвалі пэўныя навінавыя гісторыі, нягледзячы на іх папулярнасць. Напрыклад, у топ рэдка траплялі паведамленні аб рабоце кансерватыўных актывістаў у ЗША, а таксама некаторых дзеячаў Рэспубліканскай партыі - напрыклад, кандыдата на пасаду прэзідэнта ЗША Міта Ромні.

Супрацоўнікі Trending Topics прызналі, што кіраваліся суб'ектыўнымі крытэрамі пры адборы навін і гісторый. Аднак дагэтуль незразумела, ці аказвала кіраўніцтва Facebook які-небудзь уплыў на напаўненне рэйтынгу.

Сацыяльная сетка разлічвае, што апошнія змены пашыраць разнастайнасць навін, што дапаможа ёй прыцягнуць новых карыстальнікаў.