Што Дзяржкантроль шукае на нашых картках?

Нацбанк без асаблівага шуму прыняў новую пастанову - цяпер уся інфармацыя аб безнаяўных плацяжах звыш 300 рублёў будзе перадавацца ў КДК.

Адпаведную пастанову апублікаваў Нацыянальны прававы партал. Згодна з дакументам, змянілася сума мінімальнага плацяжу для падавання інфармацыі - калі раней ўлічваліся аперацыі ад 5 мільёнаў недэнамінаваных рублёў, то цяпер у поле зроку КДК патрапяць трансакцыі ад 300 новых рублёў.

Больш за тое, акрамя банкаў, цяпер адпаведную інфармацыю аб кліентах будуць падаваць нябанкаўскія крэдытна-фінансавыя арганізацыі і Банк развіцця.

Да чаго прывядуць такія меры?

Тарасаў: Гэта пачатак палявання на дробную рыбу

Фінансавы экспэрт Уладзімір Тарасаў мяркуе, што прынятыя меры наўрад ці паўплываюць на ценявую эканоміку, піша «Заўтра тваёй краіны».

- Бо і нябанкаўскіх арганізацый засталося зусім няшмат, - тлумачыць ён. - Ды і дзейнасць іх сёння рэгуляваная так, што яны не могуць быць звязаныя з ценявой эканомікай. Думаю, гэтая мера распачатая, хутчэй, для перастрахоўкі.

Суразмоўца прызнаецца, што здзіўлены зніжэннем сумы мінімальнага плацяжу для падавання інфармацыі ў КДК.

- Я думаю, што гэтая сума занадта малая, - кажа Уладзімір Тарасаў. - Мабыць, праваахоўныя органы хочуць кантраляваць зусім ужо невялікія ўгоды.

Экспэрт тлумачыць, як сёння працуе гэты механізм:

- КДК проста глядзіць на сумы і правярае па сваіх баз, ці няма нейкай падазронай інфармацыі, звязанай з чалавекам, які правёў аперацыю.

А вось калі гэтая інфармацыя патрапіць у падатковую інспекцыю, падаткавікі будуць падсумоўваць усе выдаткі і даходы, прад'яўляючы прэтэнзіі людзям, тлумачыць фінансіст.

- Кантралюючыя органы ўжо пачалі паляваць на дробную рыбу, што па-мойму не мае сэнсу, - робіць выснову Уладзімір Тарасаў.

Іосуб: Які ад гэтага будзе эфект, пакуль не вельмі зразумела

На думку старэйшага аналітыка кампаніі «Альпары» Вадзіма Іосуба, мэта гэтай пастановы цалкам відавочная і празрыстая.

- Гэта спроба кантраляваць не толькі буйныя, але і практычна ўсе хоць трохі значныя выдаткі людзей, - заўважае ён.

Кантралёры будуць параўноўваць атрыманыя выдаткі з даходамі і выяўляць, такім чынам, ценявыя даходы.

- Іншая справа, што эфектыўнасць гэтай меры не гэткая адназначная. Гэта досыць вялікі аб'ём звестак, які ў аўтаматычным рэжыме будзе ў дзяржкантроль падавацца. Але наколькі ў кантралёраў ёсць тэхнічная магчымасць яго аналізаваць? Гэта значыць, які ад гэтага будзе эфект, пакуль не вельмі зразумела.

Больш за тое, гэтыя меры ў сённяшніх рэаліях наогул могуць даць нейкі нечаканы вынік, адзначае аналітык.

- Напрыклад, людзі, якім ёсць што хаваць, у якіх ёсць незадэклараваныя даходы, будуць баяцца рабіць безнаяўныя плацяжы. Такім чынам, гэта можа прывесці да павелічэння долі плацяжоў гатоўкай у эканоміцы, - падкрэслівае Вадзім Іосуб.