«Уралкалій» забірае ў «Беларуськалія» прыбытак з кітайскага рынку

Адзін з галоўных канкурэнтаў «Беларуськалія» - расейскі «Уралкалій» - падпісаў гадавыя кантракты на пастаўку ўгнаенняў на ключавыя рынкі ў Індыю і Кітай.

Як паведамляецца, трэйдынгавая кампанія вытворцы «Уралкалій Трэйдынг» падпісала кантракт з індыйскай IPL на пастаўку 650 тыс. тон хлорыстага калію цягам жніўня 2016 - ліпеня 2017 года. Гэтая ж кампанія пачне са жніўня адгрузку 600 тыс. тон угнаенняў для кітайскага кансорцыума Sinochem, CNAMPGC і CNOOC. Пастаўкі разлічаны да студзеня 2017 года, паведамляе ej.by.

Цэны кантрактаў у Індыю і Кітай адпавядаюць «існаму рыначнаму ўзроўню», - гаворыцца ў паведамленні «Уралкалія».

Нагадаем, што Беларуская калійная кампанія ў ліпені дамовілася з кітайскімі пакупнікамі пра пастаўку больш за 1,3 млн тон угнаенняў па цане 219 даляраў за тону, а месяцам раней з Індыяй аб адгрузцы 700 тыс. тон па 227 даляраў за тону. БКК стала першым пастаўшчыком з вялікай тройкі, у якую ўваходзяць Canpotex і "Уралкалій", які задаў цэнавы трэнд сёлета. Цэны на ўгнаенні ўпалі да самага нізкага за апошнія 10 гадоў узроўню. Прыкладу беларусаў таксама рушыла ўслед ізраільская Israel Chemicals, якая падпісала з кітайскімі кліентамі кантракт з такой жа цаной.

Раней СМІ пісалі, што ўдзельнікі Canpotex у чаканні росту цэнаў збіраюцца падпісаць кантракт толькі на астатнюю частку 2016 года.