БГК можа прыняць «фінал чатырох» SEHA-лігі ў Берасці

БГК хоча арганізаваць вырашальныя матчы турніру ў Берасці ў гонар 15-годдзя клуба.

Кіраўнік папячыцельскай рады БГК Аляксандр Мяшкоў на нядаўняй прэс-канферэнцыі, прымеркаванай да перадсезоннага «Кубка Белгазпрамбанка», заявіў, што вядзецца падрыхтоўчая работа для правядзення «фіналу чатырох» SEHA-лігі ў Берасці, паведамляе «Прессбол».

«Мы вядзем вельмі сур'ёзную падрыхтоўчую работу да правядзення «фіналу чатырох» SEHA-лігі ў Берасці. Спадзяюся, у нас усё атрымаецца. Вырашальныя матчы турніру, як правіла, праходзяць у пачатку красавіка. А БГК 9 красавіка 2017 года споўніцца 15 гадоў. І гэты турнір будзе выдатным падарункам клубу.

Але ёсць умова. Па-першае, БГК неабходна патрапіць у «фінал чатырох» без якіх-небудзь карэкціровак рэгламенту.

Па-другое, горад павінен быць гатовы прыняць такое сур'ёзнае спаборніцтва. Гэта лагістыка, гатэлі, харчаванне і многае іншае. Ёсць праграма дзеянняў. Яе рэалізацыяй займаюцца адміністрацыя клуба, дырэктарат лігі. Абласныя і гарадскія выканаўчыя камітэты таксама ў курсе і праводзяць неабходныя мерапрыемствы», - сказаў Мяшкоў.