Уладзіслаў Ганчароў: Рыхтаваўся да Алімпіяды з шасці гадоў

Беларускі алімпійскі чэмпіён рэалізаваў сваю мару ў Рыа.

Пра тое, што пачаў рыхтавацца да Алімпіяды з шасці гадоў, распавёў сёння падчас прэс-канферэнцыі алімпійскі чэмпіён у скачках на батуце Уладзіслаў Ганчароў, паведамляе БелТА.

Уладзіслаў Ганчароў, адказваючы на пытанне, ці адчуў ён важнасць свайго тытула пасля вяртання з Рыа-дэ-Жанэйра, распавёў, што ад усіх прыкмет зорнай хваробы хутка вылечыць галоўны трэнер каманды Вольга Уласава, а перад выступам у Бразіліі ён трэніраваўся асабліва старанна.

«Рыхтаваўся да Алімпійскіх гульняў з шасці гадоў. Як толькі прыйшоў у скачкі на батуце, была мэта - выступіць на галоўных стартах чатырохгоддзя, марыў стаць чэмпіёнам. Перыядычна хваля захліствае, што дамогся такога высокага выніку, але стараюся не думаць шмат пра гэта. Імкнуся ставіцца спакойна да ўсіх сваіх перамог. Пасля Рыа я застаўся ранейшым», - распавёў Уладзіслаў Ганчароў.

Алімпійскі чэмпіён у скачках на батуце адзначыў таксама цёплую сустрэчу ў роднай спартовай школе ў Віцебску і падзякаваў усім, хто яго павіншаваў з поспехам на Гульнях. «Прыемна было пасля доўгага перапынку бачыць у роднай СДЮШАР №1 усіх трэнераў, вучняў, якія прыйшлі мяне павіншаваць. Быў вельмі крануты такім цёплым прыёмам. Паспрабую радаваць усіх маіх заўзятараў і далей», - падкрэсліў беларускі батутыст.

Уладзіслаў Ганчароў распавёў, што прадаў тэлефон, падораны партнёрамі Алімпіяды ў якасці прэзента пераможцу, адзначыўшы, што пакупніком стаў мужчына, які папрасіў застацца невядомым, а ўсе грошы, атрыманыя ад продажу, будуць перададзеныя роднай СДЮШАР №1.

Залаты медаль Уладзіслава Ганчарова стаў адзінай узнагародай вышэйшай пробы беларускай нацыянальнай каманды на летніх Гульнях у Рыа. Усяго на XXXI летняй Алімпіядзе айчыннымі спартоўцы здабылі 9 медалёў.