Камбайн упраўлення справамі Лукашэнкі разбіў аўтамабіль і адмовіўся плаціць кампенсацыю

Кіроўца аўтамабіля цудам застаўся жывы, цяпер яго чакаюць судовыя разборы з калгасам.

На пачатку жніўня ў Браслаўскім раёне 66-гадовы кіроўца Fiat Palio урэзаўся ў неразабраную жняярку камбайна, які выехаў яму насустрач з-за павароту. Аўтамабіліст застаўся цэлым, але Fiat аднаўленню не падлягае. І хоць вінаватым у ДТЗ прызнаны камбайнер, яго працадаўца добраахвотна кампенсаваць шкоду аўтамабілісту адмовіўся. Не дапамагла і страхавая кампанія - камбайн не быў застрахаваны, таму ніякіх выплат пасля аварыі пацярпелы не атрымаў, піша tut.by.

- А 12.00 я ехаў дадому па звілістай гравійцы недалёка ад вёскі Урбаны (Браслаўскі раён). Дарога там няважная, да таго ж уначы прайшоў дождж, усюды былі лужыны, таму ехаў я не больш 40-50 км/г, зрэшты, я і на асфальце не ганю ніколі, - успамінае Павел Паўлавіч, уладальнік Fiat Palio. - Раптам з-за павароту выязджае камбайн з прычэпленай наперадзе жняяркай. Загадзя заўважыць яго я не мог - уздоўж дарогі расце ляшчына. Разумею, што сігануць з дарогі таксама не магу - кювет у гэтым месцы дарогі даволі глыбокі, машына проста перакулілася і ўрэзалася б у дрэвы. Пачынаю тармазіць, але машыну па мокрай дарозе нясе юзам прама на камбайн. Я ўвесь сцяўся і пачуў скрыгат разбітага шкла.

Кіроўцу Fiat заціснула ў салоне, але ён усё ж змог самастойна выйсці з машыны. Аўтамабіліст убачыў, што яго легкавік прайшоў нібы праз мясарубку - дэфармаваны капот, няма лабавога шкла, дах скамечана, як папяровы ліст. Гледзячы на зламаны аўтамабіль, Павел Паўлавіч раптам усвядоміў, што жывы застаўся толькі дзякуючы цуду.

- З кабіны камбайна вылез спалоханы механізатар, мне яго нават шкада стала. Таму, калі прыехала ДАІ, я не намагаў на медыцынскім абследаванні, знешніх прыкмет ап'янення не было, але ці мала. Я застаўся жывы - гэта галоўнае, а чалавеку горш рабіць не хацелася. Механізатара прызналі вінаватым у аварыі і павінны былі пакараць. Хоць незразумела, чаму камбайн не ехаў як трэба, з разабранай жняяркай, чаму не было машыны суправаджэння?

Павел Паўлавіч перакананы, калі б камбайн ехаў як трэба, з разабранай жняяркай, то Fiat б з ім размінуўся.

«А то шырыня дарогі 5 метраў і жняярка раскінулася на 5 метраў, куды ж мне дзявацца было?» - разважае Павел Паўлавіч.

Вінаваты ў ДТЗ механізатар працуе на камбайне падсобнай гаспадаркі «Урбаны», што належыць Нацыянальнаму парку «Браслаўскія азёры» ўпраўлення справамі Лукашэнкі. Пры афармленні аварыі ДАІ высветлілася, што камбайн не застрахаваны і гэта абсалютна законна: пералік транспартных сродкаў, якія падлягаюць абавязковаму страхаванню грамадзянскай адказнасці ўладальнікаў, пералічаны ў пункце 149 указа прэзідэнта Рэспублікі Беларусь №530 «Аб страхавой дзейнасці». І камбайнаў у абавязковым пераліку няма.

- Атрымліваецца, што ў страхавой грошы за пабітую машыну мне не выплацяць. Даішнікі адразу сказалі: у вас ёсць два шляхі - можна разысціся палюбоўна (калі кіраўніцтва Нацыянальнага парку «Браслаўскія азёры» пагодзіцца выплаціць грошы за пабітую камбайнам машыну), а можна падаць заяву ў суд, які прыме рашэнне.

Вырашыць пытанне «палюбоўна» Паўлу Паўлавічу не ўдалося: генеральны дырэктар НП «Браслаўскія азёры» доўга размаўляць з пацярпелым у аварыі не стаў і з ходу паведаміў, што нічога не будзе выплачваць добраахвотна, прапанаваўшы пенсіянеру звярнуцца ў суд.

- А дзе ўзяць грошы на адваката? Пенсія ў мяне 230 рублёў усяго, палова яе на лекі сыходзіць, - бядуе Павел Паўлавіч. - Людзі падказалі, што трэба зрабіць экспэртызу і дамагацца праўды. Прыйшлося пазычыць у знаёмых пенсіянераў грошы, якія тыя адкладалі «на труну» і заплаціць 225 рублёў за экспэртызу.

Незалежны экспэрт ацаніў шкоду, прычыненую Fiat Palio у аварыі, у суму больш за 1100 у.а. і прызнаў машыну знішчанай.

- Мне давялося прадаць тое, што засталося ад Fiat за 300 у.а. Цяпер хаджу пешшу, хоць гэта няпроста - здароўе ўжо не тое, машына мне вельмі дапамагала. Яшчэ больш залез у пазыкі - рыхтую пазоў у суд. Перажываю, ці змагу я выйграць суд і атрымаць кампенсацыю за шкоду.

У ДАІ Браслаўскага раёна паведамілі, што ўчыніўшы аварыю камбайнер за ўчыненае ДТЗ прыцягнуты да адміністрацыйнай адказнасці - яму вынеслі папярэджанне.

Аднак у НП «Браслаўскія азёры» паведамілі, што ніякіх дакументаў аб ДТЗ з іх камбайнам і легкавой машынай да іх не паступала.

- Гэтыя людзі [пацярпелы ў ДТЗ з жонкай] прыйшлі да мяне пасля ацэнкі пашкоджанняў сваёй машыны і прасілі аплаціць шкоду. Але на дзяржпрадпрыемстве я не магу самастойна прымаць рашэнне аб добраахвотнай выплаце грошай. Я ім адразу сказаў: звяртайцеся ў суд, там прымуць рашэнне аб выплаце, - пракаментаваў кіраўнік НП «Браслаўскія азёры» Віталь Дрожжа. - Бо я асабіста не прысутнічаў і не ведаю, наехаў на іх хто-небудзь ці не. Кіроўца камбайна мне сказаў тады: «кіроўца Fiat падскочыў пад мяне сам, я яго не бачыў». Пазіцыя гэтых людзей адна, а майго механізатара - іншая. Да таго ж камбайн не хуткасны транспарт і выязджаў з-за павароту.

Віталь Дрожжа растлумачыў, чаму камбайнер не зняў жняярку: у гаспадарцы сярэдняя контурнасць палёў 2 гектары. Бывае, што камбайну проста трэба пераехаць дарогу, каб патрапіць на суседняе поле, таму жняярку яны не здымаюць.

У Галоўдзяржтэхнаглядзе Мінсельгасхарча паведамілі, што буйнагабарытная сельскагаспадарчая тэхніка можа выязджаць на дарогу агульнага прызначэння пры выкананні патрабаванняў бяспекі, апісаных у інструкцыі завода-вытворцы.

- Вядома, буйнагабарытная тэхніка з шырокім захопам працоўнага абсталявання не можа проста так ездзіць па дарогах. Умовы бяспечнага перамяшчэння для кожнага віду сельгастэхнікі свае. Напрыклад, паводле інструкцыі, перад выездам на дарогу агульнага карыстання жняярку з камбайна трэба здымаць, усталёўваць на каляску і транспартаваць асобна. Часам пры перагонах сельгастэхнікі на вялікія адлегласці з калонай едуць машыны суправаджэння. Як правіла, на адзінкавую сельгастэхніку машыны суправаджэння не вылучаюць.

Чым скончыцца суд і ці выплацяць пацярпеламу шкоду? Пытанне застаецца адкрытым.