Разборкі ў Менскай вобласці: бізнэсоўца забілі каля ўласнага дома
57- 26.09.2016, 13:25
- 15,860
На месцы трагедыі, якая адбылася раніцай 26 верасня ў Беразіно, дагэтуль працуюць экспэрты, следчыя, міліцыя і МНС.
«Мясцовы бізнэсовец выехаў з дому, у яго дом на ўскрайку лесу. Яго там непадалёк спынілі, застрэлілі, аўтамабіль падпалілі. Побач ехаў мясцовы пажарнік на працу, бачыць, стаіць аўтамабіль, з яго дым ідзе, адкрыў дзверы, разгледзеў цела, паспрабаваў яго дастаць, па ім з лесу страляць пачалі, каб адагнаць ад аўто. Ну ён у машыну па газах і ў міліцыю», - паведаміў tut.by мясцовы жыхар Вадзім.
Са словаў яшчэ аднаго мясцовага жыхара, прыяцеля Вадзіма, увагу выратавальніка, які праязджаў побач, прыцягнуў дым з-пад капота Audi Q5 на абочыне. Каля аўтамабіля мужчына ўбачыў «чалавека з падпаленай анучай, які кінуў яе на капот і ўцёк у лес».
Хутчэй за ўсё, яго спудзіў выратавальнік - у якога сапраўды сталі страляць з лесу, кажуць відавочцы. Але ён, са словаў мясцовых, мужчыну ў аўтамабілі ўжо нічым бы не дапамог, нават калі б паспеў дастаць - у салоне аўто быў труп з агнястрэльнымі раненнямі.
Афіцыйных каментароў пакуль няшмат.
- А 7.09 нам паведамілі, што на выездзе з Беразіно на трасе Барысаў-Беразіно-Бабруйск гарыць адкрытым полымем аўтамабіль. Супрацоўнікі РАУС разам з калегамі з іншых структур, якія прыбылі на месца, знайшлі ў салоне труп мужчыны. Ягоная асоба пакуль не ўстаноўленая, - паведаміў TUT.BY прэс-сакратар УУС Менаблвыканкама Яўген Сачак.
Выратавальнікам пра здарэнне паведамілі на хвіліну раней: «Падраздзяленні МНС выбылі на месца і аператыўна патушылі аўтамабіль, які гарэў адкрытым полымем. У салоне быў знойдзены труп мужчыны», - паведаміў прэс-сакратар МНС Віталь Навіцкі.
- На месцы здарэння працуе следча-аператыўная група. Высвятляюцца абставіны смерці мужчыны, труп якога быў знойдзены ў салоне згарэлага аўтамабіля, - паведаміла афіцыйная прадстаўніца УСК у рэгіёне Таццяна Беланог.