Міліцыянт расстраляў менчука ў навагоднюю ноч

28-гадовы працаўнік «Кераміна» знаходзіцца ў рэанімацыі.

Раніцай 1 студзеня ў кватэры на вуліцы Любімава ў Менску адбыўся канфлікт паміж 28-гадовым хлопцам і супрацоўнікам міліцыі.

Версіі праваахоўнікаў і сваякоў менчука разыходзяцца. Але дакладна вядома, што міліцыянт страляў у хлопца, пацярпелы цяпер знаходзіцца ў шпіталі.

У ГУУС Менгарвыканкама паведаміў, што 1 студзеня а 6.40 у міліцыю паступіў сігнал аб шуме ў кватэры, на месца выбыў супрацоўнік, адзін. Маладзён, які выйшаў на званок з кватэры, напаў на яго, спрабаваў завалодаць табельнай зброяй.

Таму міліцыянт, папярэдзіўшы правапарушальніка, зрабіў папераджальны стрэл, а затым «параніў нападаўшага ў мяккія тканкі». Затрымаў яго. Пацярпелы праапераваны, у супрацоўніка міліцыі – чэрапна-мазгавая траўма.

Паводле факта супраціву органаў унутраных спраў распачатая крымінальная справа (арт. 363 КК).

Маці параненага 28-гадовага Андрэя не верыць, што сын справакаваў інцыдэнт. Ён адзін адкрываў дзверы, а за ёй было некалькі супрацоўнікаў міліцыі, «два дакладна», - паведаміла яна БелаПАН.

«Гэта могуць пацвердзіць сведкі», - заявіла Галіна.

З ейных слоў, на месца здарэння прыязджалі супрацоўнікі міліцыі, Следчага камітэта, дасталі дзве кулі, адну – з лінолеўма ў тамбуры пад'езда.

У Андрэя закранутая частка лёгкага, распавяла яго маці. Ён зараз знаходзіцца ў 432-м галоўным вайсковым клінічным шпіталі Узброеных сіл пад аховай у стабільна цяжкім стане. У свядомасці, але не размаўляе. Маці да сына не пускаюць.

Новыя падрабязнасці перастрэлкі ў навагоднюю ноч у сталіцы паведамляе «Ежедневник».

Як распавяла журналістам чытачка, здарэнне адбылося ўжо пад раніцу 1 студзеня. У міліцыю паступіў званок аб тым, што суседзі ў доме 28 па праспекце газеты «Звязда» занадта шумяць і не даюць спаць. Міліцыя па ўказаным адрасе прыбыла аператыўна, бо апорны пункт знаходзіўся ў суседнім доме.

Са слоў чытачкі, на выклік прыбылі тры вартавыя правапарадку, да якіх на пляцоўку і выйшаў гаспадар кватэры, на шум у якой скардзіліся суседзі. Само сабой, 28-гадовы работнік ААТ «Керамін» быў нецвярозы. Што здарылася далей, ніхто не бачыў, бо госці заставаліся ўнутры кватэры. Але нечакана яны пачулі стрэлы і выбеглі на пляцоўку.

На сцвярджэнне сведак, гаспадара кватэры даслоўна стрымана расстралялі: адзін стрэл супрацоўнік міліцыі нібыта зрабіў у спіну, а другі - па нагах. Пры гэтым сам міліцыянт, які страляў, адразу ж уцёк з месца здарэння, а два іншыя засталіся.

Бацькі і сябры пацярпелага зараз знаходзяцца ў шоку. Яны проста не разумеюць, што адбылося, і як у цэнтры Менска, у Навагоднюю ноч супрацоўнікі міліцыі вось так спакойна маглі страляць у чалавека. Са слоў сведак, работнік «Кераміна» быў цалкам спакойным чалавекам, не валодаў ніякімі навыкамі рукапашнага бою і не меў пры сабе ніякай зброі. Іншымі словамі, нават калі дапусціць, што ён пачаў аказваць супраціў міліцыі, трое вартавых правапарадку зусім спакойна маглі скруціць п'янага дэбашыра без прымянення агнястрэльнай зброі.

Цяпер да разгляду таго, што адбылося падключыўся Следчы камітэт. Сам 28-гадовы жыхар Менска знаходзіцца ў рэанімацыі ў цяжкім стане.

Афіцыйны прадстаўнік ГУУС Менгарвыканкама Аляксандр Ластоўскі распавёў іншую версію падзей.

«Паводле папярэдняй інфармацыі, сітуацыя развівалася так. А 6.40 ў міліцыю паступіў званок, што ў кватэры па суседстве ўсю ноч шум і гам, які перашкаджае адпачываць. Трэба разумець, што ў гэтым гарадскім аддзеле міліцыі, куды паступіў званок, усю ноч людзі на выкліках знаходзяцца, таму на выклік адпраўлялі, каго маглі. На выклік на месца прыбыў адзін супрацоўнік міліцыі. Дзверы кватэры адкрыў грамадзянін, які адразу ж пачаў паводзіць сябе агрэсіўна і неадэкватна. Ён наносіць супрацоўніку міліцыі фізічныя пашкоджанні і спрабуе завалодаць яго табельнай зброяй. Супрацоўнік міліцыі гэтую спробу спыняе. Спачатку ён робіць вуснае папярэджанне, потым - папераджальны стрэл. Грамадзянін на гэта не адрэагаваў, і тады супрацоўнік міліцыі робіць два стрэлы і прычыняе дэбашыру раненні. У выніку грамадзянін дастаўлены ў медыцынскую ўстанову, праапераваны і яго жыццю нічога не пагражае. Супрацоўнік міліцыі дастаўлены ў шпіталь МУС з чэрапна-мазгавой траўмай. Паводле гэтага факта распачатая крымінальная справа паводле арт. 363 ч. 2 Крымінальнага кодэкса Беларусі (супраціў супрацоўніку органаў унутраных спраў або іншай асобе, якая ахоўвае грамадскі парадак)», - растлумачыў Аляксандр Ластоўскі.