Дыктатар ужо апраўдаў навагодняга «стралка» ў пагонах

Пацярпеламу ў навагоднюю ноч ад рук міліцыянта мінчаніну прад'яўленае абвінавачванне.

Пра гэта сёння паведаміў журналістам старшыня Следчага камітэта Беларусі Іван Наскевіч паводле вынікаў дакладу Лукашэнкі, паведамляе БелТА.

«У рамках расследавання падазраванаму ўжо прад'яўлена абвінавачванне. Ён знаходзіцца ў статусе абвінавачанага ў аказанні супраціўлення супрацоўніку міліцыі, што выконваў службовыя абавязкі аховы грамадскага парадку. Цяпер яму абраная мера стрымання ў выглядзе ўзяцця пад варту, пакуль ён знаходзіцца ў лячэбнай установе», - сказаў Іван Наскевіч.

Старшыня Следчага камітэта адзначыў, што Лукашэнка звярнуў асаблівую ўвагу на расследаванне гэтай крымінальнай справы.

«Кіраўніком дзяржавы была звернутая ўвага на тое, што ніхто не мае права аказваць супраціў супрацоўнікам міліцыі і тым больш ужываць да іх гвалт, бо гэта можа пацягнуць у тым ліку прымяненне зброі, безумоўна, у рамках дзейнага заканадаўства», - падкрэсліў кіраўнік установы.

Як паведамлялася, здарэнне адбылося раніцай 1 студзеня. У міліцыю паступіў званок аб тым, што суседзі ў доме 28 па праспекце газеты «Звязда» занадта шумяць і не даюць спаць. Міліцыя паводле паказанага адраса прыбыла аператыўна, бо апорны пункт знаходзіўся ў суседнім доме.

На выклік прыбылі тры вартавыя правапарадку, да якіх на пляцоўку і выйшаў гаспадар кватэры, на шум у якой скардзіліся суседзі. Само сабой, 28-гадовы работнік ААТ «Керамін» быў нецвярозы. Што здарылася далей, ніхто не бачыў, бо госці заставаліся ўнутры кватэры. Але нечакана яны пачулі стрэлы і выбеглі на пляцоўку.

На сцвярджэнне сведак, гаспадара кватэры ў даслоўным сэнсе стрымана расстралялі: адзін стрэл супрацоўнік міліцыі нібыта зрабіў у спіну, а другі - па нагах. Пры гэтым міліцыянт, які страляў, адразу ж уцёк з месца здарэння, а два іншыя засталіся.

Праваабаронцы заяўляюць, што справа ў дачыненні да навагодняй міліцэйскай стральбы ідзе аднабакова.